E homber C., sospecha di a abusa di e mucha muher Z. (13) a wordo declara liber.
SOLO DI PUEBLO por a compronde cu algun dia despues di tratamento di e caso algun siman pasa, Hues a ordena pa laga e padastro C. Diabierna Hues a declara e sospechoso homber C. liber di a abusa di e yiu muher di su pareha.
FISCAL A EXIGI 4 AÑA DI PRISON
Dia 7 November 2025 Corte di Husticia a trata e caso penal contra e homber C., kende ta wordo acusa di a abusa di e mucha muher Z. (13) cu ta yiu di su pareha. E padastro C. tabata para riba cu e no a haci nada y cu tur loke e mucha ta declara, no ta berdad.
Fiscal na su turno a bisa Hues cu e mucha Z.(14) a wordo abusa door di su padastro. Fiscal a mustra cu segun e relato di Polis, Z. a declara cu dia 1 Januari 2025, su padastro C. a abusa di dje. Esaki a sosode den e auto di C. Di dos biaha tabata 5 Januari 2025 cu tabata den e cas. E otro biaha tabata 6 Januari 2025 den auto banda di un hotel. Fiscal a bisa cu segun Z., tabatin mas biaha cu e abuso sexual a sosode pero Z. no ta corda fecha exacto. E ultimo biaha tabata Februari 2025, ora cu e mama no tabata na cas. E tempo ey Z. tabatin 13 aña. Segun Z. tabatin un discusion entre C. y su mama pasobra e mama a keda 3 dia for di cas. E mucha Z., a dal C. cu un sker na su lomba pasobra C. tabata choca su mama den baño. E mama D. a bisa na Polis cu su yiu muher Z. a cont’e cu el a wordo abusa door di un bisiña y su padastro.
Fiscal a bisa Hues cu e ta haya cu e declaracion di Z. ta confiabel. Fiscal ta haya cu tin suficiente prueba di sosten y ta haya cu C. ta culpabel. Fiscal a sigui bisa cu C. a tacha integridad di e mucha Z (13). Fiscal a remarca cu loke ta condenabel, ta cu sabiendo cu Z. a wordo abusa di un bisiña, C. a bolbe abusa di Z. Fiscal a bisa cu ta conoci cu mucha ta keda afecta. Fiscal ta haya cu C. no a para responsabel pa loke el a haci.
Pa cu e castigo, Fiscal a bisa cu e ta tene cuenta cu ta promer biaha cu C. ta cay den man di husticia. Tambe Fiscal a tene cuenta cu C. a abusa diferente biaha di e mucha y ta su padastro. Fiscal a exigi 4 aña di prison. Pa loke ta e demanda di daño, Fiscal ta haya cu esaki a wordo entrega laat door di abogado mr. D.Croes y ta laga na Hues su decision.
ABOGADO
Abogado mr. Canwood a bisa Hues cu C. ta desmenti categoricamente di a abusa di Z. E abogado ta haya cu no tin prueba di sosten. Mr. Canwood a mustra cu for di declaracionnan den e raport di Polis por compronde cu Z. a bay for di cas pasobra su mama D. a zundr’e cu e ta manda potret sunu pa hombernan mayor. E mucha a bay keda na cas di conocirnan. E abogado a mustra cu e mucha Z. a tene relacion sexual cu otro hombernan y hasta a keda drumi na cas di un di e hombernan. E mama D. mes a bisa cu Z. ta hopi fresco y tabata pidi D. placa pa e cumpra sigaria y droga. E mama D. tabata nenga di duna su yiu Z. placa.
Segun abogado, e mama D. a casa cu C. pa asina e por haya papel di estadia. E abogado a bisa cu e mucha Z. tabata odia C. y hasta a bisa su mama D., pa laga C. E abogado a mustra cu no a haya nada di DNA di C. na paña of curpa di Z. Na opinion di mr. Canwood, no por prueba legal cu C. a abusa di Z. E abogado ta haya cu tur e cos aki ta pasobra cu C. no a regla e papelnan di estadia pa D. y Z. E abogado ta haya cu mester declara D. liber.
SOSPECHOSO DECLARA LIBER
Diabierna 28 November 2025, Hues a dicta sentencia den e caso contra C. Ta asina cu C. no a presenta. Su abogado mr. Canwoord si tabata presente. Hues a declara C. liber. Hues a bisa cu e declaracion di e mucha Z. ta confiabel pero no tin pruebanan di sosten manera ley ta exigi den casonan di abuso sexual of actonan inmoral. Hues a bisa cu e declaracion di e mama y otro hende no por usa como prueba di sosten pasobra esaki a bin for di declaracion di e mucha Z.
