Señalamento di abogado den Corte di forma no corecto di interogacion di banda di miembro di Narcotica, a causa cu Hues a instrui Fiscal pa e video y grabacion di interogacion di e 4 sospechosonan di importacion di 6.5 kilo di marihuana. A resulta cu Hues ta haya cu a bay di mas den e interogacionnan.
SOLO DI PUEBLO por a compronde cu apesar cu dos Mericano a bisa cu nan a bin cu e lote di marihuana pa e homber F.G.G., Hues a declara F.G.G. liber di importacion di marihuana.
Den Corte di Husticia a trata pa oranan largo un interesante caso, caminda abogado mr. Carlo, kende a defende e sospechoso F.G.G. a señala con miembro di Narcotica ta forza dos Mericano declara contra su cliente F.G.G. Hues a constata cu enberdad tabatin un forma di set up di agente di narcotica contra F.G.G.
DOS MERICANO GARA CU DROGA
Siman pasa tratamento di e caso a tuma lugar, caminda e Mericanonan A.T., M.L. y J.B. ta wordo acusa di importa, transporta y posecion di marihuana entre 20 y 21 Maart 2025. Fiscal a acusa F.G.G. cu entre 20 y 21 Maart 2025, hunto cu otronan a importa marihuana y tambe cu entre 21 Januari 2021 y Maart 2025, e tabata bende marihuana y cocaina.
Durante tratamento di e caso, Hues ta mustra cu segun e relato di Polis, dia 20 Maart 2025 a detene A.T. na aeropuerto cu 3 kilo di marihuana den maleta, ora el a yega Aruba. J.B. tambe a wordo deteni. Su siguiente dia a detene M.L. cu 3.5 kilo di marihuana, ora el a yega Aruba. Tanto A.T. como M.L. a bisa cu nan a bin cu e droga pa propio uso y pa fiesta cu amigonan. A.T. a bisa cu ta J.B. a paga su pasashi. J.B. a desmenti esaki. El a bisa cu A.T. a pidi’e pa yud’e cubri e pasashi y cu na Aruba, J.B. lo haya marihuana ya cu J.B. ta un usador di marihuana.
FORMA DI INTEROGA NO NORMAL
Hues a mustra cu segun e relato di Polis, A.T. a bisa cu el a bin cu J.B. y cu e droga ta pa F.G.G. Den Corte, A.T. a bisa Hues cu na oficina di Polis, el a wordo bisa cu si e menciona F.G.G. ta doño di e droga, e lo wordo laga liber. Segun A.T., e droga no ta pa F.G.G. El a bisa Hues cu e conoce F.G.G. na beach durante e biahanan cu el a bishita Aruba y cu F.G.G. ta yud’e cu jetsky. Hues a bisa cu na Polis, nan a mustra A.T. potret di F.G.G. y cu el a bisa cu ta di dos biaha cu e ta trece marihuana pa F.G.G.
Pa loke ta M.L., Hues a mustra cu na Polis M.L. a bisa cu ta pa F.G.G. el a trece e droga. Den Corte M.L. a desmenti esey. El a bisa Hues cu na Polis el a tende tur hende menciona F.G.G. y pesey el a menciona F.G.G. pa asina e por bay cas.
F.G.G. a para riba cu e no tin nada di haci cu e 6.5 kilo di marihuana. Hues a puntra F.G.G., pakico A.T. y M.L. ta bisa cu e droga ta pa F.G.G. El a bisa Hues cu un miembro di Narcotica, a bisa nan pa papia contra dje pa hink’e den droga. Segun F.G.G., e tin 25 aña ta traha cu turista na beach y tin turista ta puntra pa droga y e ta mustra serca ken nan tin cu bay.
Hues a mustra cu den e cellular di F.G.G., Polis a haya chat di un Mericano cu F.G.G. caminda e Mericano ta puntra si F.G.G. por sa unda por haya cocaina bon. F.G.G. a bisa Hues cu si Polis a sigui wak e chat, lo a mira cu F.G.G. a papia cu esun cu ta bende droga pa atende cu e turista. Hues a sigui bisa cu segun e raport di Polis, tin hendenan a declara di a cumpra cocaina for di F.G.G.
AGENTE LO A SET UP
Abogado mr. Carlo a haci tanto A.T. como M.L. pregunta, ki ora Polis a mustra nan e potret di F.G.G. M.L. a bisa cu den auto di Polis nan a mestr’e e potret y bise cu e mester declara contra F.G.G. pasobra tin un caso contra dje. A.T. a bisa cu den camber di interogacion nan a mustre e potret. E abogado a puntra su cliente F.G.G. si tin un agente di Narcotica cu tin algo contra dje. F.G.G. a splica cu e agente tin algo contra dje pasobra e agente ta kere cu ta door di F.G.G., un amiga Mericano a blockea e agente. F.G.G. a bisa Hues cu e agente a bisa F.G.G. cu e lo bay colg’e.
EXIGENCIA DI FISCAL
Fiscal a bisa cu A.T. y M.L. ta practicamente mesun cos. Fiscal ta haya legalmente proba cu nan a importa marihuana. Fiscal a exigi pa ambos 12 luna di prison, kitando e tempo cu nan ta cera den KIA.
Fiscal a sigui bisa cu e ta haya cu J.B. ta envolvi den importacion di marihuana. Fiscal ta haya cu J.B. ta culpabel di organisa transporte di droga. El a exigi 18 luna di prison pa J.B.
Fiscal ta haya cu F.G.G. ta envolvi den imporatacion di 6.5 kilo di marihuana y tambe bendemento di marihuana y cocaina. Fiscal a mustra cu F.G.G. a yega di wordo condena caba pa droga pero ta sigui. El a exigi 4 aña di prison pa F.G.G.
DEFENSA DI ABOGADONAN
Abogado mr. Carlo a cuestiona e hecho cu no por confia e declaracion di e acusadonan A.T., M.L. y J.B. E abogado a bisa cu su cliente F.G.G. ta para riba cu e no tin nada di haci cu droga y tampoco bendemento di droga. E abogado a remarca cu e declaracionnan duna ta door di Polis cu a indica e tres acusadonan, kico nan mester declara pa asina colga F.G.G. E abogado a mustra cu no tin ningun indicacion cu e 6.5 kilo di marihuana ta di F.G.G. E abogado a bisa Hues cu e ta haya cu tin buraconan den e caso aki y cu Hues mester declara F.G.G. liber y pa e haya su cellular bek.
Abogado mr. D.Croes di J.B. a bisa Hues cu ta A.T. y M.L. a wordo gara cu droga y no su cliente. E abogado a bisa cu no tin ningun comunicacion entre J.B. cu A.T. y M.L. El a mustra cu a confisca 609 dollar di J.B. y esey no ta indicacion cu J.B. ta meti den droga. El a pidi Hues pa declara J.B. liber y pa J.B. haya cu cellular y su 609 dollar bek.
Abogado mr. Emerencia di M.L. a bisa Hues cu su cliente a wordo gara cu un lote di marihuana. El a bisa cu M.L. a bisa cu el a bin cu e droga pa fiesta. Esaki no ta mustra cu ta bendemento di droga y un organisacion tin.
Abogado mr. Mohamed a bisa Hues cu su cliente A.T. a admiti di a bin cu marihuana. El a pidi Hues pa no confisca e cellular.
HUES A BAHA CASTIGONAN EXIGI
Hues a sera tratamento di e caso y a dicta sentencia di biaha. Hues ta haya A.T. y M.L., culpabel di a importa marihuana. Hues no ta haya cu J.B. ta envolvi den e importacion di marihuana pero si cu e ta envolvi cu A.T.
Pa loke ta F.G.G., Hues a bisa cu el a scucha y mira e interogacionnan y ta haya cu esakinan ta sugestivo manera mr. Carlo a mustra. Sinembargo, segun ley, Polis por trece cosnan sugestivo durante interogacion pero den e caso aki Hues ta haya cu a bay di mas. Hues a bisa cu no por controla cu tin problema entre e agente y F.G.G.
Hues a bisa cu apesar cu A.T. y M.L. ta bisa cu a trece droga pa F.G.G., no por bisa cu F.G.G. ta envolvi den importacion di 6.5 kilo di marihuana. Hues a declara F.G.G. liber di e acusacion di importacion di droga. Hues ta haya F.G.G. culpabel di bendemento di droga. Hues ta haya cu F.G.G. tabata un intermediario pa turistanan haya droga y esey ta haci cu F.G.G. ta complice. Ademas tin declaracion di hendenan cu ta bisa di a cumpra droga for di F.G.G.
TUR ACUSADO POR A BAY CAS
Hues a condena A.T. y M.L. na 12 luna di prison di cual 5 luna ta condicional cu 3 aña di prueba. Esey ta nifica cu e mesun dia ey, nan a wordo laga liber.
Hues a condena J.B. tambe mesun cos cu ta haci cu e tambe a wordo laga liber.
Hues a condena F.G.G. na 14 luna di prison di cual 7 luna ta condicional cu 3 aña di prueba. Hues a hala su atencion pa no manda turistanan pa otro hende pa cumpra droga mas.
Hues a bisa cu e cellular di F.G.G. ta keda confisca pero A.T., M.L. y J.B. ta haya nan cellular bek y tambe cu J.B. ta haya su 609 dollar bek.
