Corte di husticia a dicta un sentencia contundente contra minister Gerlien Croes, despues di su intento pa despidi ilegalmente Sabine de Groot, un hoofdcoördinator na programa Ensefiansa pa Empleo.
Un retiro sin motibo
De Groot a cuminza su trabou cu contrato firma riba 1 di februari 2025. E Ministerio a paga su salario mensual mas toelagen, i tabata prueba cla cu su nombramento tabatin respaldo financiero. Apesar cu tur cos a wordo formalisa, Croes a manda un carta riba 31 di juli 2025 pa despidí De Groot, alegando cu no tabatin base legal ni presupuesto.
Segun corte, esey ta un motibo inventa. “Ta cla cu un contrato a wordo firma, trabou a cuminza i pago a wordo hasi. Gobierno no por nenga realidad,” hues a indica den su motivacion.
Corte: “Abuso di poder”
E sentencia no laga espacio pa duda: Croes abusa di su poder. E hues a resalta cu minister Croes ni sikiera a tene cuenta cu situacion personal di De Groot: un mama soltera cu dos yiu adolescente, dependiente riba e salario pa mantencion di su famia.
Hues a agrega cu manera cu Gerlien a trata e asunto ta “poco empatico i inaceptabel”, un falta di respet no solamente pa De Groot, sino tambe pa regla basico di bon gobernacion.
E sentencia duro contra Croes
Corte a ordena:
Restitucion inmediato di De Groot den su posicion, Pago di su salario atrasa mas tur toelagen desde 30 di augustus 2025, Un multa di Afl. 500 pa dia si Croes no cumpli, te un máximo di Afl. 250.000, Pago di tur gasto di proceso.
Reputacion di Gerlien den duda
E caso ta un golpi duro pa reputacion politico di minister Gerlien Croes. Pa hopi, e manera cu el’a trata un empleada leal ta un ehempel di arrogancia, falta di empatia i abuso di autoridad. Den un isla caminda confianza den liderazgo ta fragil, e accionnan di Croes solamente ta profundisa e duda den su maneho di ministerio.
Si un minister ta trata un mama soltera asina, kico por spera e pueblo di Aruba?
E sentencia ta un victoria importante pa Sabine de Groot, pero mas ainda un recordatorio pa gobierno: poder no ta licencia pa haci abuso. Pa minister Gerlien Croes, e caso aki ta un berguenza historico cu lo sigui persigui su nomber politico pa hopi tempo.
Texto exacto di hues contra Gerlien:
“Het komt er dus op neer dat de opzegging naar voorlopig oordeel inderdaad misbruik van bevoegdheid oplevert en dat dit naar maatstaven van redelijkheid en billijkheid kennelijk onaanvaardbaar is jegens De Groot.”
