Awe mainta, Hues a dicta sentencia den e caso penal cu Ministerio Publico a cuminsa contra Richard Lacle, Brian Koolman, Norben Giel y Nelson Cabral de Andrade (Speed).
SOLO DI PUEBLO por a compronde cu Hues a baha e castigo cu Fiscal a exigi pasobra Hues no ta haya proba e acusacion di cu e grupo tabata forma parti di un organizacion criminal. Hues tambe a expresa cu periodistanan no por viola ley pa haya informacion secreto di Polis.
EXIGENCIA FISCAL
Luna pasa durante tratamento di e caso, Fiscal a bisa cu tur 4 sospechoso a cumpra Vos pa haya informacion di Polis. Fiscal ta haya cu Vos a viola su deber como Polis door di ricibi placa, regalo pa haci cosnan contra di su deber.
Fiscal a exigi 2 aña di prison pa Speed y a exigi pa detencion di biaha ora Hues dicta sentencia. Fiscal a exigi 18 luna di prison di cual 8 luna ta condicional pa Giel y Lacle y cu 3 aña di prueba. Fiscal a exigi 6 luna di prison pa Koolman cu 3 aña di prueba.
A CUMPRA VOS
Hues awe mainta den su sentencia, a cuminsa na bisa cu e ta declara tur cuater acusado liber di e acusacion di a forma parti di un organizacion criminal. Hues ta haya cu no tin suficiente prueba. Hues a sigui bisa cu Speed, Giel y Lacle ta culpable di a cumpra Vos. Hues ta haya proba cu Speed, Giel y Lacle a paga Vos. Cada un a haci’e na nan manera. Hues a bisa cu e ta haya e declaracion di Vos confiabel. Na opinion di Hues, no ta esey so. E declaracion di Vos, ta wordo confirma door di e chatnan riba whatsapp. Tin prestamo di placa haci y a duna regalo, pa asina move Vos como ambtenaar haci cosnan cu ta contra di su obligacion como agente di Polis.
Hues ta haya tur cuater periodista culpable cu Vos a viola su obligacion di comparti informacionnan secreto di Polis. Hues a bisa cu Vos no a haci’e su so. E acusadonan a yuda door di duna diferente laptop, facilita aparato wifi, instalacion di cierto apps pa asina haya tur informacion for di radio di Polis. Hues ta haya cu cada un a haci aporte significante den esaki.
NO POR HACI DELITO PA HAYA INFORMACION
Hues a bisa cu pa cu e acusacion di organizacion criminal, no tin suficiente prueba di trahamento structural pa por papia di organizacion criminal. Pesey ta declara nan liber.
Hues a reacciona riba defensa di abogado, cu mester tene cuenta cu libertad di prensa. Hues a bisa cu en principio mester respeta esaki pa democracia den un pais. Sinembargo, e limite di libertad di prensa ta wordo determina pa ley.
Hues a enfatisa cu un periodista no por haci delito pa haya informacion. Hues ta haya cu esaki a sosode den e caso aki. El a bisa cu solamente den caso excepcional por tin excepcion.
Pa cu e castigo, Hues a bisa cu e ta tene cuenta cu seriedad di e caso. E ta haya cu aki ta trata di un caso serio caminda a causa cu Vos a viola su obligacion y daña imagen di Polis. Esaki a crea duda den Polis door cu informacion secreto di Polis ta cay den man di e acusadonan. Hues ta haya cu esaki por causa peliger den comunidad.
Hues a tuma e acusadonan na malo cu door di sensacion y nan propio interes a haci esaki.
CASTIGO COMBINA
Hues a bisa cu e ta castiga e acusadonan menos cu Fiscal a exigi, pasobra e no ta haya proba e organizacion criminal. Hues a condena Lacle y Giel na 240 ora di trabao pa comunidad y si no cumpli cu esaki, lo mester bay 120 dia sera den KIA. Tambe Hues a condena Lacle y Giel na 12 luna di prison condicional cu 3 aña di prueba. Esey ta nifica cu si den e periodo di 3 aña nan haci algo contra ley, nan lo por haya e 12 luna di prison riba e castigo cu nan lo haya pa e delito cu nan a haci.
Hues a condena Speed na 18 luna di prison di cual 12 luna ta condicional cu un tempo di prueba di 3 aña. Esey ta nifica cu Speed mester bay 6 luna sera den KIA. Hues a bisa cu Speed a haya mas castigo pasobra Speed a haci e delito aki den su tempo di prueba pa e mesun delito aki cu el a yega di haci den pasado.
Hues a condena Koolman na 150 ora di trabao pa comunidad y si e no cumpli cu esaki, e lo mester bay sera 75 dia di prison. Tambe un castigo condicional di 3 luna di prison cu 3 aña di prueba.
