Hues di Corte di Husticia den Promer Instancia a dicta sentencia den e caso penal cu Ministerio Publico a cuminsa contra e homber J.P.(30) biba na Hulanda. Ta asina cu Hues a ordena pa laga J.P. liber promer cu su sentencia, pasobra Hues tin un otro decision cu loke Fiscal a exigi.
SOLO DI PUEBLO por a compronde cu Fiscal a exigi 18 luna di prison pa J.P. mientras cu Hues a baha e castigo na 1 aña di prison.
18 LUNA DI PRISON EXIGI
Dia 4 April 2025, durante tratamento di e caso, Fiscal a bisa cu e ta haya cu riba 17 October 2024, J.P. a purba mata un agente di Polis cu auto. Na opinion di Fiscal, danki Dios cu e agente a bula un banda pa e auto no dal’e.
Fiscal a remarca cu na Hulanda, J.P. tin un carchi di castigo hopi largo. El a mustra cu na 2016 caba, Corte na Hulanda a condena J.P. na 6 aña di prison pa intento di mata. Fiscal a sigui bisa cu J.P. tambe tin condena pa droga.
Fiscal a bisa cu e ta haya cu J.P. ta un residivista. Fiscal a exigi 18 luna di prison pa J.P. Fiscal a bisa cu e droga lo wordo destrui. E cellular y placa lo mester wordo debolbe.
HUES A BAHA E CASTIGO EXIGI
Hues a bisa cu e no ta haya prueba cu J.P. a purba di mata e agente di Polis. Hues a bisa cu e ta haya cu J.P. a purba di causa herida severo na e agente di Polis. Hues a bisa cu e motibo cu e no ta haya proba intento di mata ta pasobra e no ta haya cu J.P. tabata core cu velocidad halto y bay riba e agente di Polis. Hues a bisa cu e ta haya prueba cu J.P. tabatin droga den e auto.
Pa cu e castigo, Hues a bisa cu e ta tene cuenta cu J.P. a bay cu e auto riba e agente di Polis. Hues ta haya cu esaki ta mina trabao di Polis. Hues a tuma J.P. na malo pa esaki. Tambe Hues a cu J.P. tabatin cocaina cun’e.
Hues a condena J.P. na 12 luna di prison di cual 6 luna ta condicional cu un tempo di prueba di 2 aña. Hues a bisa cu el a duna orden pa laga J.P. sali liber tempran, pasobra Hues ta haya cu ya caba J.P. a sinta suficiente castigo.
