Diahuebs mainta e homber F.D.L.S.D. ( 55) a presenta den Corte pa e caso penal cu Ministerio Publico a cuminsa contra dje. E ta wordo acusa cu riba 4 Augustus 2022, a maltrata dos agente di Polis.
SOLO DI PUEBLO por a compronde cu F.D.L.S.D. a para riba cu e no a maltrata Polis. El a bisa cu e tabata geboei y ta Polis a maltrat’e.
A MALTRATA POLIS
Fiscal a bisa cu e acusacion contra F.D.L.S.D. ta cu dia 4 Augustus 2022, el a maltrata dos agente di Polis. Por a ripara cu F.D.L.S.D. tabata hopi emociona y tabata bisa cu e no a maltrata e dos agentenan y cu e tabata geboei.
Hues, diferente biaha mester a hala atencion di F.D.L.S.D. pa e keda trankil y scucha kico Hues ta bisa. Hues a puntr’e kico a pasa dia 4 Augustus 2022.
F.D.L.S.D. a bisa Hues cu el a pleita cu su yiu pa asunto di auto. Despues di e pleitamento, el a cuminsa saca tur su cosnan for di e auto. El a sigui bisa cu na dado momento Polis a yega su tras y a bis’e cu e ta deteni. Segun F.D.L.S.D., e no a resisti y a laga Polis boei su mannan y el a bay cu nan. Segun e sospechoso, durante cu e tabata canando, Polis a push’e y el a slip den un rooi y cay. E sospechoso a bisa Hues cu esey tabata e momento cu Polis a dal’e.
“MI NO A DAL POLIS”
F.D.L.S.D. tabata hopi emociona y a lanta su manga di flanel pa mustra Hues caminda cu Polis a dal’e cu clob na su man drechi y cu te ainda e tin un bulto eynan. El a sigui bisa cu despues 3 otro agente di Polis a bin lucha cun’e. El a bisa cu un di nan a primi su zapato na su nek. F.D.L.S.D. a para riba cu e no a dal Polis pasobra e tabata geboei. El a nenga tambe di a morde y skop e agentenan di Polis, manera ta para den e relato di Polis. F.D.L.S.D. a bisa Hues cu e no a resisti contra Polis.
HUES A POSPONE E CASO
Na dado momento, abogado mr. Illes a presenta den sala di Corte. E abogado, cu cara sorprendi, a informa Hues cu el a haya yamada un dia promer di Departamento di Asuntonan Social pa tuma e caso pero e no a haya oportunidad di comunica cu F.D.L.S.D. y no tabata sa cu e caso tabata Diahuebs. Hues a compronde e situacion y a duna e abogado chens pa e papia cu e sospechoso pafor di sala di Corte. Ora e abogado a bolbe, el a pidi Hues pa pospone e caso pa asina e por prepara su mes pa defende F.D.L.S.D. Hues a bisa e abogado cu e caso ta keda pospone pa dia 19 Juni 2025 mainta.
