Awe mainta Hues a dicta sentencia den e caso penal cu Ministerio Publico a cuminsa contra e miembro di Guarda Costa, e homber E.F.
SOLO DI PUEBLO por a compronde cu Hues a declara E.F. liber pa dos acusacion y a haya E.F. culpabel pa e otro acusacionnan. Hues ta haya e castigo cu Fiscal a exigi no ta refleha seriedad di e caso y a subi castigo pa E.F.
EXIGENCIA DI FISCAL
Dia 17 di September 2026 tratamento di e caso a tuma lugar, caminda Fiscal ta acusa E.F. di malversacion di motor di un boto na cuartel di Guarda Costa, ladronicia y viola ley di arma, di a pisca calco cu ta protehi pa ley na 2025.
Fiscal ta haya E.F. culpabel di e acusacionnan y a mustra cu un empleado di Guarda Costa, ta viola ley. Pa cu e castigo, Fiscal a bisa cu e ta tene cuenta cu esaki ta un caso bieu cu a crece for di un otro caso. Fiscal a tene cuenta cu E.F. a abusa di su posecion, envez di duna ehempel. El a exigi 100 ora di trabao pa E.F.
SENTENCIA
Ayera mainta E.F. door di ta malo no a presenta den Corte. Su abogado mr. Carlo si tabata presente. Hues a bisa cu e ta declara E.F. liber di e acusacion di labamento di placa di municion, y pisca calco. Hues a bisa cu na Guarda Costa no tin maneho estableci kico ta haci cu municion y flare cu a caduca. Hues ta haya cu no por bisa cu e municion tabata malversa. Tambe e piscamento di calco tampoco no a keda proba. Hues a bisa cu tin chat cu E.F. ta papia di piscamento di calco pero no tin ningun indicacion cu el a pisca.
CULPABEL DI A HORTA MOTOR DI BOTO
Hues a bisa cu e ta haya proba cu E.F. a horta motor di boto na Guarda Costa. Hues a mustra cu tin chat caminda E.F. ta bisa un amiga cu el a horta un motor di boto na Guarda Costa. Despues E.F. a bisa e amiga cu e mester a hiba e motor bek. Hues a sigui bisa cu tambe tin chat cu na hefe den Guarda Costa P., E.F. a bisa cu hunto cu L. a horta motor y P. a bis’e trece e motor bek. Hues a bisa cu e no ta kere declaracion di E.F. cu e no a horta sino cu a bay pone e motor pa test riba un otro boto.
INTENTO DI PISCA CALCO
Hues a bisa cu tambe e ta haya proba e intento di pisca calco. Hues a mustra cu tin chat entre E.F. cu M. caminda nan ta papia di bay pisca calco pero E.F. no a bay. Pesey Hues ta considera cu esaki ta purba di pisca calco.
CASTIGO
Hues a tuma na malo cu E.F. kier a bay cu un motor y tambe cu e kier pisca calco, siendo cu ta E.F. su deber pa cuida calco cu ta protehi.
Hues ta haya cu e castigo exigi pa Fiscal no ta mustra e seriedad di e caso. Hues ta haya cu ta importante pa manda señal cu no tolera esaki. Hues a confirma e 100 ora di trabao pa comunidad y si E.F. no cumpli e lo mester bay 50 dia sera. Hues a pone aserca, un castigo condicional di 1 luna di prison cu un tempo di prueba di 1 aña.
