Homber sospecha di ta complice di horta diferente Banco Matico declara liber
ORANJESTAD – Hues di Corte di Husticia a dicta sentencia den e caso penal cu Ministerio Publico a cuminsa contra e homber Domicano biba na Aruba J.B. (40).
SOLO DI PUEBLO por a compornde cu luna pasa tratamento di e caso a tuma lugar caminda Fiscal a haya J.B. culpabel di a yuda dos Bulgaro horta carchi di banco y a exigi 1 aña di prison p’e. Awor, Hues a declara J.B. liber pasobra Hues ta comparti punto di bista di abogado mr. Canwood, cu no por reconoce J.B. riba camera di seguridad.
SOSPECHOSO TA NENGA
E acusacion cu Fiscal a presenta contra J.B. ta, cu entre 8 November 2024 y 20 December 2024 a horta carchi di banco di un persona hunto cu 2 Bulgaro. A haci uso di carchi di banco falsifica. Ta asina cu e dos Bulgaronan ya a wordo condena na castigo di prison. Hues a puntra J.B. kico e tin di bisa di e acusacion. J.B. a bisa cu e no tin nada di haci cu e caso aki.
Hues a bisa cu riba camera di seguridad ta mira J.B. hunto cu e dos Bulgaronan na e banco matico. Segun J.B., Polis a mustr’e potretnan di un persona pero esey no te. Hues a bisa cu riba potretnan tin un persona cu pechi cu bril di solo bisti pa e no wordo reconoce.
YUDA CU HORTA BANCO MATICO
Hues a puntra J.B. si Polis a haci investigacion na su cas. El a bisa cu promer cu el a wordo deteni, no. El a sigui bisa cu e no sa si ora e tabata cera, Polis a haci esey. Hues a bisa cu e caso anterior a wordo posponi pasobra Hues tabata kier sa con Polis ta reconoce J.B. Tin un relato di Polis, caminda 6 agente di Polis ta bisa cu den pasado caba a yega di detene J.B. pa caso similar. J.B. a bisa Hues cu na 2018, el a wordo deteni pa un caso similar. El a bisa cu e tempo ey, el a wordo presiona pa e hendenan y e tabata core auto bay diferente banco matico. Na 2018 el a wordo condena na 10 luna di prison.
Despues tabatin un otro caso. J.B. a bisa cu e conoce hende cu ta huur auto y e ta yuda hende haya auto y asina ta gana di comision. Na 2021 el a hiba hendenan na e persona cu a huur e auto. Despues e hendenan a yam’e y bis’e pa entrega e auto. Parce nan a haci un delito y Polis a detene J.B. y puntra unda e otronan ta. Despues a detene e hendenan na un cas cu aparato di skimming pa copia credit cards.
Hues a bisa cu desde October 2025, J.B. ta encarcela y tabata trahando pa un compania. J.B. a bisa Hues cu el a compronde cu doño di e trabao a bisa cu J.B. por haya e trabao ora e sali for di KIA.
FISCAL A EXIGI 1 AÑA DI PRISON
Fiscal a bisa Hues cu e ta haya legalmente proba cu J.B. ta envolvi den e hortamento na banco maticonan di Banco di Caribe. Ta asina cu Mastercard a haya denuncia di diferente doño di carchi cu nan no ta na Aruba pero a lanta placa for di nan cuenta. Mastercard a bati alarma na Banco di Caribe. Parce cu Banco di Caribe su bancomaticonan no tabata suficiente prepara pa skimming. Mastercard a pone Banco di Caribe responsabel pa tur e placanan cu a wordo lanta. Fiscal a bisa cu tin 6 agente di Polis cu a reconoce J.B. riba e cameranan di vigilancia. Fiscal a bisa Hues, cu el a bay wak e imagennan di video di seguridad y e ta reconoce J.B. Fiscal a bay hopi amplio con e usamento di carchinan falsifica tabata sosode hunto cu e dos Bulgaronan y por mira J.B. tabata para patras. Mas cu 25 mil florin a lanta for di bancomaticonan. Fiscal a remarca cu J.B. ya caba a wordo condena pa caso similar. Fiscal a bisa cu e no tin ningun motibo pa duda den Polis. Fiscal a bisa cu e ta haya cu J.B. ta “wrong and strong”. El a exigi 12 luna di prison pa J.B.
ABOGADO TA CUESTIONA POLIS
Mr. Canwood a bisa Hues cu e no ta comparti Fiscal cu J.B. ta “wrong and strong”. E abogado a bisa cu den pasado tambe J.B. a wordo bisa esey y el a wordo declara liber. Na opinion di abogado ta unicamente Polis lo a reconoce J.B. riba potret. J.B. semper a nenga cu e ta reconoce su mes riba e potretnan y tambe cu e no conoce e otro 2 Bulgaronan. E abogado a bisa cu Polis tin e cellular di J.B. confisca pero no tin nada di cu e tabatin coneccion cu e 2 Bulgaronan. E abogado a bisa Hues cu e tin e impresion cu Polis a bay busca un persona cu lo tabata envolvi den pasado y a indica cu ta J.B. Mr. Canwood a cuestiona cu Polis no a bay investiga riba pañanan di J.B. pa mira si nan ta cuadra cu loke ta mira riba e videonan di seguridad.
E abogado a cuestiona reconocimento di Polis di J.B. E abogado a bisa Hues cu e 6 agentenan di Polis ta bisa cu nan a reconoce J.B. su modus operandi, esta e forma di cana y actua ta mescos cu den casonan anterior. E abogado a bisa Hues cu el a busca investigacion riba caso 2021 caminda a resulta cu no tin imagennan di J.B. Mr. Canwood a remarca, con 6 agente di Polis ta bisa asina siendo cu no tin imagen di J.B. E abogado a remarca cu esaki no ta cuadra cu e realidad. El a sigui bisa cu ta pesey, J.B. a wordo declara liber na 2021 y na 2018 el a wordo condena pa a core auto pero no a baha bay na bancomatico.
E abogado ta haya cu intencional, e 6 agentenan di Polis a viola e bon procedura di caso penal caminda ta menciona cosnan cu no ta cuadra cu e realidad. Abogado a menciona sentencianan di Hulanda caminda Hues ta cuestiona cu mester haci mas investigacion y no por bay bisa cu ta reconoce e persona sin mas. Abogado a pidi Hues pa declara J.B. liber. Si a caso Hues haya J.B. culpabel, abogado ta pidi Hues pa conden’e na un castigo igual na loke e 2 Bulgaronan a sinta cu ta 8 luna, cu ta loke J.B. a sinta caba.
HUES TA DECLARA SOSPECHOSO LIBER
Siman pasa Diabierna, Hues a dicta sentencia cu a expresa cu e ta haya cu mester declara J.B. liber mescos cu abogado ta mustra. Hues ta haya cu no tin reconocemento drechi di A.B. Segun Hues, J.B. a bisa cu no ta e tabata hunto cu e dos hombernan na e banco maticonan. Hues a mustra cu seis agente di Polis ta bisa cu nan ta reconoce J.B. a base di casonan anterior similar. E agentenan di Polis a bisa cu nan ta reconoce J.B. nan su forma di actua.
Hues a bisa cu e no por a reconoce J.B. riba e imagennan di seguridad. El a bisa cu por mira un persona color bruin y cu bril di solo y pechi, pero no por reconoce e persona. Ademas e otro dos acusadonan no a bisa nada di J.B. Hues a conclui cu e no ta haya legalmente proba cu J.B. ta complice y ta declara J.B. liber. Por a mira cu J.B. a keda sumamente contento. Lo ta interesante pa mira awor con ta bay haci cu e casi 1 aña di prison cu J.B. ta encarcela inhusto.
