Diahuebs mainta Corte di Husticia a trata e caso penal cu Ministerio Publico a cuminsa contra e homber A.F. (33), kende ta un conoci di husticia.
SOLO DI PUEBLO por a compronde cu Fiscal a exigi castigo di prison y detencion di biaha den Corte di A.F. Hues a dicidi di duna A.F. un chens y no a sigui exigencia di Fiscal pa detencion di biaha den Corte.
Fiscal a acusa A.F. cu enrte 14 December 2023 y 23 Maart 2024, e tabata bende cocaina y marihiuana.
BENDEMENTO DI DROGA
Hues a puntra A.F. si e acusacion ta berdad. A.F. a desmenti y a bisa cu el a caba di sali for di KIA na December 2023 y despues di 2 luna e no por ta bendiendo droga manera ta acuse di dje. El a bisa Hues cu e ta un usador di droga. Hues a remarca cu segun e declaracion di A.F. na Polis, A.F. a admiti di tabata bende droga. A.F. a bisa Hues cu e agentenan di droga a skirbi cos cu e no a bisa. Hues a mustra cu segun e raport di Polis. Polis a haya informacion cu den e promer cuartal di 2024, A.F. cu ta wordo yama Swiso tabata bende droga den Driemasterstraat, dilanti ex United Dinner. Ta asina cu A.F. a sali for di KIA, 14 December 2023. Polis a bay observa 5 y 6 Maart 2024 na ex United Dinner. Por a mira cu A.F. tabata sinta banda di un bari di sushi blauw y mas hende para eynan. Tabatin hende ta bay serca A.F. y ta duna A.F. algo y A.F. ta duna algo. E agentenan di droga tabata sospecha cu ta bendemento di droga tabata tuma lugar. A planea un accion 23 Maart 2024. A detene esnan cu a bay serca A.F. y puntra nan kico nan tabata haci. Despues a bay detene A.F. y bay su cas pa mira si tin droga eynan. Ora A.F. a mira Team di Aresto, el a core bay pero a keda deteni.
NENGA DI A BENDE DROGA
Caminda A.F. tabata sinta banda di un bari blauw, Polis a haya un tas preto cu basta placa aden y e cellular berde. A.F. a bisa cu e tas ta di dje pero e cellular no. Tambe a haya un saco di papel cu sakitonan di plastic cu cocaina y sakitonan di plastic cu marihuana. Mas na banda di United Dinner a haya un saco cu marihuana y sakitonan di plastic cu cocaina. A pisa e droganan cu ta mustra 72,9 gram di marihuana y 23,8 gram di cocaina.
Hues a bisa cu na Polis, A.F. a bisa cu cierto cantidad di e droga ta di dje. Esnan cu a haya otro caminda banda di United Dinner no ta di dje.
Na cas di A.F., Polis a haya marihuana (280 gram) den cushina y 7.3 gram di cocaina. E cantidad di placa den e tas, tabata 2046 florin y mas cu 800 dollar. Segun A.F. e placa ta di su señora. El a bisa cu ta placa di tips cu su señora ta dun’e. Hues a puntra pakico ta cana cu asina hopi placa y no ta warda e placa na cas. Segun A.F. na cas no ta safe pa warda placa.
Polis a detene un hende cu a cumpra 3 piedra for di A.F. El a bisa cu el a cumpra for di un guy blanco cu hopi tattoo cu ta sinta den hoeki di United Dinner. El a cumpra 3 biaha y 1 luna pasa el a cumpra for e persona. El a reconoce A.F. ariba potret cu Polis a mustr’e. Otro testigo a bisa cu de vez en cuando e ta cumpra piedra for di Swiso. Un otro a bisa cu e ta cumpra piedra for di Swiso.
Na Polis, A.F. a declara cu e droga cu a haya na su cas ta pa su mesun uso. Polis a mustr’e e potretnan di droga cu a haya na United Dinner. Segun e procesverbaal, A.F. a bisa cu e saco di papel cu a haya droganan aden banda di e bari di sushi, ta di dje. El a bisa cu el a cumpra e droganan pa su mesun uso. El a bisa cu el a wordo acerca si e kier bende droga eynan hunto cu otronan. El a bisa cu el a cuminsa bende droga, pasobra su situacion financiero ta malo. Hues a bisa cu A.F. a bisa cu e otro droganan cu a haya no ta di dje. El a bisa cu si hende pidi’e pa bende droga, e ta haci’e pero e droga ta di dje. Mientras cu Hues tabata lesa e procesverbaal, A.F. tabata sacudi cabez. Ora Hues a caba, A.F. a remarca cu e no ta compronde Hulandes y el a firma e declaracion.
KIER CAMBIA BIDA
Segun A.F. e tabata 7 aña sera y no por ta asina cu e ta sali for di KIA y por bende asina. Segun A.F., e chollernan a gaña riba dje. El a bisa cu e chollernan ta bisa loke Polis kier, pa asina nan no bay sera. El a bisa cu e sa laga chollernan laba su auto y e ta duna nan piedra pero no bende.
Ariba pregunta haci di Fiscal, A.F. a bisa cu e ta fada di husticia. El a remarca cu tin masha hopi pisca y husticia ta blo tira riba dje. El a bisa cu el a pasa mitar di su bida sera den KIA. E no kier ta sera mas. E kier bay Hulanda cu su pareha y su yiu. El a bisa cu Hof a declar’e liber den e caso di arma caminda e tabata sera 9 luna inhusto. El a bisa cu e tin placa pa haya di e caso ey y cu esey e tin pensa di bay Hulanda pa cambia su bida.
FISCAL A EXIGI PA DETENCION DI BIAHA
Fiscal a bisa Hues cu Polis a mira A.F. ta haci movecion sospechoso. Dia 23 Maart 2024 a haci accion y a haya e droganan. Tin testigonan cu a bisa di a cumpra droga for di A.F. Fiscal a mustra cu e droga cu a haya patras di e bari di sushi blauw, tabata caminda A.F. tabata sinta y ningun hende mas tabata ey banda. Na e cas caminda A.F. a keda, a haya droga tambe. Na Polis, A.F. a bisa cu e tabata bende entre 1 y 2 luna, despues cu el a sali for di KIA. Esaki pasobra no tabata facil pa e haya trabao. Tin testigonan cu a declara cu nan a cumpra for di A.F. Fiscal a bisa cu awor ta scucha A.F. bisa cu e no a declara asina. Fiscal a remarca cu A.F. no mester a firma e ora. Fiscal ta haya cu a keda legalmente proba cu A.F. tabata bende droga y cu 31,14 gram di cocaina y 366,7 gram di marihuana ta di A.F. Na opinion di Fiscal, no por bisa cu A.F. tabata bende marihuana. No a haya ningun testigo cu a bisa di a cumpra marihuana for di A.F. (Swiso). Pesey Fiscal ta haya A.F. culpable di posecion di marihuana. Fiscal a mustra cu droga ta hopi adictivo y ta trece hopi criminalidad y problema den famia. E ta haya cu A.F. a colabora den esaki. Fiscal a bisa cu A.F. tin carchi di castigo cu casonan pero ta promer biaha cu e ta dilanti Hues pa caso di droga. Fiscal a exigi 12 luna di prison, di cual 6 luna ta condicional cu 3 aña di prueba. Tambe Fiscal a exigi pa detencion di biaha di A.F. y hiba KIA. E placa cu Polis a confisca lo mester keda confisca.
ABOGADO
Abogado mr. Croes, a bisa Hues cu A.F. a declara na Polis cu loke a haya na su cas ta di dje pa propio uso. El a bisa cu e cuestion di saco di papel banda na United Dinner, no ta di A.F. E ta haya cu Polis a manipula declaracion di A.F. Segun abogado, e chollernan a duna declaracion manera Polis kier a scucha pasobra nan no kier bay sera. Abogado ta haya cu A.F. ta marca pa husticia. E tin 3 yiu cu su pareha di cual 1 ta di dje. E kier mustra su yiunan pa hiba un bida drechi. E abogado a mustra cu actualmente A.F. tin un trabao. El a pidi Hues pa tene cuenta cu e situacion di A.F. E abogado ta haya hopi cruel pa bay detene A.F. awor aki. El a mustra cu A.F. a pasa hopi trabao pa a haya un trabao. El a pidi Hues pa duna A.F. castigo igual na loke e tabata sera y bou guia di Reclasering pa mantene riba e bon caminda.
Na final, A.F. cu su mannan cruza manera ta resa, a pidi Hues pa yud,e pa e drecha su bida. Por a mira cu A.F. tabata hopi desespera y no kier bay KIA.
SENTENCIA
Hues a sera tratamento di e caso y a dicta sentencia di biaha. Hues a bisa cu e ta haya mescos cu Fiscal legalmente proba bendemento di droga. Hues a bisa cu e no ta haya proba cu e otro droganan cu a haya mas leu for di unda A.F. tabata sinta, ta di A.F. Hues a sigui bisa cu e no ta duda den declaracion di e testigonan. El a bisa cu e no ta kere nada cu A.F. a bisa cu Polis a inventa declaracion. Hues a bisa cu bendemento di piedra ta causa hopi criminalidad.
Pa cu e castigo, Hues a bisa cu e ta tene cuenta cu e periodo cortico cu e bendemento di droga a sosode y cu awor A.F. tin trabao y cu A.F. kier drecha su bida. Hues a bisa cu e no ta sigui exigencia di Fiscal di detencion inmediato. Hues a bisa cu e kier duna A.F. un chens pa A.F. drecha su bida. Hues a condena A.F. na 365 dia di prison di cual 344 dia ta condicional cu 3 aña di prueba. E droganan lo wordo destrui y e placanan lo keda confisca. Esey ta nifica cu A.F. no mester bay sera. Por a mira A.F. hala rosea di alivio y contento. El a sali for di sala di Corte, bisando: “Nunca mas e ta bay bende droga”.
