ORANJESTAD – Awe mainta Hues di Corte di Husticia pa casonan di empleadonan di Gobierno, a dicta sentencia den caso cu señor Hoo, director di Inmigracion a cuminsa contra e prohibicion di Minister di Husticia pa Hoo drenta Inmigracion.
SOLO DI PUEBLO por a compronde cu Hues ta mustra cu ta parce cu Minister ta hiba un fishing expedition pa haya motibo pa kita Hoo. Hues a suspede e decision di Minister
MINISTER TA SUSPENDE HOO
Minister di Husticia a tuma e decision di prolonga e prohibicion di Hoo pa subi riba tereno y drenta oficina di Inmigracion. E decision ta fecha 18 Februari 2026 cu ta bisa cu e prohibicion di 8 Januari 2026 ta wordo prolonga cu 6 siman, entrante 19 Februari 2026.
Ta asina cu Hoo a wordo nombra como director di Inmigracion Aruba (IA) entrante 23 Januari 2024 y ya tabatin un sentencia caba caminda Hues di Corte a suspende e decision di Minister contra Hoo.
PROBLEMA ENTRE MINISTER CU HOO
Minister di Husticia a tuma decision 21 October 2025 pa pone Hoo encarga cu e coordinacion di e independizacion di e departamento di rijbewijs, pa un periodo di 6 luna. Den e decision di Minister, e mandatario ta cuestiona e forma di traha di Hoo na Inmigracion y cu Hoo lo a haci expresionnan menos bunita riba whatsapp di Minister.
Hoo a haci protesta contra e decision aki y Hues di Corte a suspende e decision di Minister, te ora cu Corte tuma un decision riba e protesta di Hoo. Esaki a trece cune cu desde 15 December 2025, Hoo por a bay bek Inmigracion y traha como director. Entretanto, Minister a hala su decision aden pero 8 Januari 2026, Minister ta tuma e decision pa di inmediato prohibi Hoo subi riba tereno y drenta oficina di Inmigracion. E Minister ta bisa den su decision, cu e suspension ta relaciona cu un investigacion cu ta haciendo riba e forma di hiba maneho di Hoo y cu ta sospecha cu Hoo lo a cambia informacion riba e sistema RADEX y tambe asuntonan financiero administrativo.
PERSECUSION POLITICO
Abogado mr. Steward, kende a defende señor Hoo, a mustra den Corte cu nan no ta di acuerdo cu e decision di Minister y cu esaki ta inhusto y ta pa un periodo mucho largo. E abogado a mustra cu e Minister, desde cu el a ocupa e funcion aki, pa motibonan politico of personal, ta busca formanan pa crea motibonan di desconfianza y asina kita Hoo for di su funcion. E abogado a mustra den Corte cu e motibonan cu e Minister ta menciona pa hustifica su decision, ta identico cu esnan cu a usa pa e suspension anterior.
Na opinion di abogado, e situacion no a cambia compara cu e situacion di December 2025. E abogado a bisa cu Hoo ta desmenti di a cambia informacion di RADEX y tampoco a viola reglanan financiero administrativo.
FISHING EXPEDITION DI MINISTER
Hues den su evaluacion di e caso ta mustra cu segun ley, ora Minister ta tuma un medida diciplinario, mester tin motibonan concreto. Tambe mester specifica e tempo cu esaki ta drenta na vigor y e duracion di e medida aki. Ademas e Minister mester splica bon cla con e presencia di e empleado di Gobierno na trabao, lo stroba e investigacionnan.
Hues a remarca cu durante tratamento di e caso, el a haci pregunta riba e motibonan concreto y e abogado di Minister no a duna ningun contesta satisfactorio. Hues ta haya cu henter e asunto aki ta un intento fracasa, sin ningun splicacion hustifica di Minister. Hues a bisa cu e tin e impresion cu aki Minister ta haci un “fishing expedition” cu e meta pa haya motibonan pa kita Hoo for di trabao.
SUSPENDE DECISION DI MINISTER
Hues su decision ta cu ta suspende e decision di Minister di 18 Februari 2026, te ora cu tin un decision riba e protesta contra e decision aki. Esey ta nifica cu Hoo por bolbe su funcion.
