Te cu awe Hulanda no por splica na forma satisfactorio dicon nan ta exigi un rijkswet pa supervision financiero di pais Aruba.
Tur nan splicacionnan treci dilanti, cu ta un hypotheek, ta carece di base y ta sin sentido di realidad.
Ta mas bien parce cu algun Hulandes na Den Haag sea ta terco, of tin gusto personal pa un rijkswet. Di legalidad of motibo hustificabel, no tin ningun!
Segun Hulanda: Aruba por kibra acuerdo y tuma otro decision. Pues nan kier e Rijkswet pa asegura cu ora yega otro gobierno, pa nan no kibra acuerdo. Esaki te coy loco y estupides di mas grandi cu nos por a scucha.
No ta berdad! Hulanda tin suficiente grip riba cualke gobierno
E ponencia di Hulanda ta robes, pero 1000% y 2000% robes.
Actualmente nan tin tur grip di supervision finanxiero: Nan tin:
- Gobernador; gobernador por firma of keda sin firma begroting. El’a pasa na 2014 ora a duna Mike Eman un KB. No tabatin rijkswet
- Na 2015, Aruba y Hulanda a firna pa LAFT, cual ta encera supervision di CAFT. Den e LAFT ta poni esplisicamente cu Aruba no por cambia LAFT sin autorisacion di Hulanda.
Si Aruba no por cambia e LAFT sin autorisacion di Hulanda, kemen cu ningun Gobierno por bandona cualke acuerdo di LAFT!
Pues e deseo di rijkswet ta un ambicion draconico contra Aruba.
Aruba ta cumpliendo cabalmente cu supervision
Tur cifras di Aruba ta na ordo. Hulanda no por bisa cu e rijkswet ta pasobra cu Aruba no ta cumpliendo. Esey ta e pensamento den Tweedekamer, cu kisas algun Hulandes ta hiba redashi y e pobercitonan cu no sa mihor, cu no ta aplica wederhoor, ta kere ciegamente y saca conclucion robes.
Conclucion ta cu te cu awe Hulanda no a splica, dicon un rijkswet, of mihor bisa ki te grip cu nan lo haya, di loke nan no tin awor
No ta keda nos nada otro pa pensa cu ainda e mentalidad colonial, e mentalidad di esclavo keto bay ta core den e DNA y e venanan di ambtenaarnan Hulandes, unda por saca un conclucion: e rijkswet ta pa otro motibo! Pa sacia nan sed di colonialismo. Nan no por laat los!
Y e hasimento di negoshi riba lomba di Aruba, ta sigui! Hulanda tambe por “doe het voor de kinderen”, pero ta riba lomba di e kinderen di Aruba nan kier gana 300 miyon florin di intrest. Esey ta cambia e ora “doe het voor Nederland”!
