Diasabra mainta (ora local) weganan di round di 16 a inicia y prome wega tabata entre seleccion di Hulanda y seleccion di Merca.

Hulanda den fase di grupo a keda lider di grupo A mientras cu Merca a keda number 2 di grupo B.

Hulanda tabata favorito pa gana e wega aki, pero no cu un margen grandi.

Wega aki a inicia cu bon velocidad di ambos banda, Merca den prome minuutnan sigur a hunga un futbol rapido cu kizas por a sorprende e hulandesnan, pero tabata na di 10 minuut ora cu Denzel Dumfries ta e bala y ta haci un pase perfecto pa Memphis Depay cu ta anota prome gol di wega pa pone Hulanda ariba cu score di 1-0.

Merca a keda pone presion pa empata e wega caminda cu na algun ocasion keeper di Hulanda mester a trece salbacion.

Den minuutnan extra di prome mitar un biaha mas Denzel Dumfries ta haci otro pase perfecto y e biaha aki pa Daley Blind cu ta haci e wega 2-0 pa Hulanda.

Prome mitar a bay den descanso cu score di 2-0 na fabor di Hulanda.

Den di dos mitar, ekipo mericano a keda pone presion y tabata na di 76 minuut Haji Wright ta corta ventaha pa Merca.

Seleccion mericano tabata parce di por a yega na e gol di empate, pero na di 81 minuut e heroe di Hulanda den e wega aki Denzel Dumfries ta anota un bunita gol pa Hulanda y asina ta sentencia e wega cu score di 3-1.

Cu e victoria aki Hulanda ta clasifica pa cuart final y lo bay enfrenta Argentina kende a gana Australia cu score di 2-1 cu golnan di Lionel Messi y Julian Alvarez.

LEAVE A REPLY

Please enter your comment!
Please enter your name here