Minister di Asunto Economico y Clima di Hulanda, Heleen Herbert, a expresa satisfaccion cu e progreso cu Aruba a logra den diferente proyecto strategico, durante un reunion cu Prome Minister Mike Eman na Hulanda. E encuentro ta sigui despues di e combersacionnan cu ambos mandatario a tene na mei di e aña aki, durante cual nan a trata diferente posibilidad di cooperacion entre Aruba y Hulanda.
Segun minister Herbert, ta positivo pa constata cu den a penas algun luna, diferente iniciativa cu nan a discuti anteriormente a avansa considerabelmente. E minister a menciona particularmente pa busca desaroyo nobo di tereno di refineria, trece mehora den distribucion di energia na Aruba y e presencia di Wageningen University & Research (WUR) riba nos isla. Herbert a destaca cu e cooperacion entre Aruba y Hulanda ta importante, no solamente pa futuro economico di Aruba, sino tambe pa Reino Hulandes den su totalidad. E proyectonan ta brinda oportunidad pa amplia e base economico, promove innovacion y fortalece e cooperacion den diferente sector.
Un di e temanan principal durante e reunion tabata e proyecto HART (Herinrichting Aruba Raffinaderij Terrein), cu ta enfoca riba preparacion di e tereno di refineria pa un destinacion economico nobo. Segun Herbert, e preparacionnan ta avansando y ta acercando e momento pa por inicia cu procedura di destaho relaciona cu limpiesa di e tereno. Minister Herbert a confirma a demas cu pronto e lo realisa un bishita di trabou na e islanan ABC, pues incluyendo Aruba. Durante e bishita aki, e minister kier mira personalmente e progresonan cu ta tumando luga.
Otro tema cu a haya atencion special ta e posibilidad di desaroya un sistema moderno pa procesa sushi na Aruba. Herbert a referi na e bishita cu e delegacion Aruba lider pa Prome Minister Mike Eman a realisa na e instalacion di HVC na Alkmaar, Hulanda, caminda nan a haya oportunidad di conoce un modelo di maneho y procesamento di sushi. E minister a reconoce cu e cantidad di sushi cu ta procesa na Hulanda ta considerabelmente mas grandi cu esun di Aruba. Sinembargo, e concepto y e experencia Hulandes por brinda idea importante pa desaroya un sistema adapta na e realidad di nos isla. Herbert a considera interesante tambe e posibilidad cu Aruba, Boneiro y Corsou por explora un forma di cooperacion regional pa procesamento di sushi, di manera cu e islanan por beneficia di un solucion comun.
Durante e encuentro, ambos mandatario a trata tambe e posicion geografico strategico di Aruba den parti zuid di Caribe. Segun Herbert, e posicion aki ta trece cierto riesgo, pero tambe oportunidad cu Aruba y Hulanda por explora hunto.
Finalmente, minister Herbert a reafirma su interes pa continua e cooperacion cu Aruba, destacando cu e proyectonan cu ta avansa actualmente por contribui na un futuro economico mas sostenibel pa Aruba y na un Reino Hulandes mas fuerte.
