Ora nos ta humilde, y nos ta comparti cu otro, nos ta corda riba necesidad di otro, y nos no ta corda solamente riba nos bienestar, Dios ta contento cu nos, pasobra Dios ta stima hende humilde.
Hende humilde ta laga Dios husa nan, nan no tin nan propio agenda di grandesa, pero nan ta disponibel pa tur bon obra, pa na tur momento nan por ta util den man di Dios, y pa Dios ricibi tur gloria.
Ta un bataya hopi grandi nos tin awendia, cu hende cu ta orguyoso, nan no kier duna otro ningun chens, semper nan kier ta mas dilanti, no ta importa cu nan ta mira otro ta sufri, pero nan orguyo ta sali pa dilanti, pasobra esey ta locual nan kier, y ta locual cu nan kier esey ta locual cu mester sosode.
Humildad ta trece pas tur momento, pasobra hende humilde sa con pordona, pasobra e naturalesa di pordon a alcansa nan curason, y nan sa cu bo no por keda, pretende riba algo tur momento, pero bo mester pordona, laga los , y laga Dios dicidi, pasobra Dios sa locual ta miho pa nos tur.
Dios ta hala atencion di hende pa nan ta hulmilde y agrada Dios, pasobra orguyo ta separa hende for di Dios:
Dios ta resisti e orguyosonan ma ta duna gracia na e humildenan .( Santiago 4:6).
Dios ta resisti e orguyosonan ma ta duna gracia na e humildenan. ( 1 Pedro 5:6).
Ora cu orguyo bini, deshonor tambe ta bini,ma sabiduria ta serca e humildenan.( Proverbionan 11:2).
Bienaventura ta esnan humilde, pasobra nan lo hereda e tera.(Mateo 5:3).
E recompensa di humildad y e temor di Senjor, ta rikesa honor y bida. ( Proverbionan 22:4).
Si Mi pueblo cu ta wordo yama na Mi nomber, humiya nan mes y haci oracion, y busca Mi cara, y bira for di nan mal camindanan, e ora ey lo Mi tende for di cielo, y lo Mi pordona nan pica y cura nan tera.( 2 Cronicanan 7:14).
Mi ta bisa boso, e homber aki, contrario di e otro, a bay su cas hustifica, pasobra ken cu halsa su mes lo wordo humiya, y esun cu humiya su mes lo wordo halsa.( Lucas 18:14).
Esun cu humiya su mes manera e mucha aki,ta esun di mas grandi den reino di cielo.( Mateo 18:4).
No haci nada cu un actitud di egoismo y orguyo, ma cu humildad laga cada un di boso, considera e otro mas importante cu e mes.No busca boso interes personal so, ma busca tambe interes di otronan.( Filpensenan 2:3).
Pesey ami, prisonero di Senjor, ta roga boso pa cana na un manera digno di e yamada, cu cual boso a wordo yama, cu tur humildad y suavidad, cu pasenshi,soportando un y otro den amor.( Efesionan 4:1-2).
Humildad ta nifica cu nos ta reconce cu nos ta depende di Dios.
Proverbionan 6:16-19 ta papia di e cosnan cu Dios ta odia, y orguyo ta un di e prome nan,
Pasobra e palabra di Dios ta sigi avisa nos con hende orguyoso no ta hanja necesario pa reconoce Dios ( Romanonan 1:28-32) y Dios mes ta entrega nan na un mente perverso, cu tur e consecuencia di locual ta para scirbi.
No tin espacio pa chansa cu Dios, pasobra Dios no ta chansa, Dios ta santo y ta permanece santo, pesey tur locual ta orguyo no ta bon bini den presencia, di Dios, y esey ta wordo ripiti hopi biaha den Su palabra, pa hende tene cuenta cu esey y arepenti di nan orguyo.
Humildad ta un bendicion.
Sinceramente, Pastor Marcel Balootje
