Edmond Croes, miembro di e famia Croes, a sali den publico pa comparti su opinion riba e maneho di autoridad cu ta relaciona cu keho di bullying contra Speed Andrade. Croes ta argumenta cu, a pesar di su esfuerso pa tuma tur paso legal pa stop e bulying, ni Ministerio Publico (OM), ni Corte, ni HOF a tuma e consecuencianan di e situacion na serio. Keho no a wordo atendi: “Nan mes a cria e monster.”
Segun Croes, e famia a entrega varios keho formal contra Speed Andrade, pero e contesta di OM tabata consistentemente negativo. “Ministerio Publico no ta haya cu su bullying serio. Tambe nan a bisa cu no tin personal pa investiga e caso.” E apelacion tambe no a resulta den un cambio; Corte y HOF a apoya e decision di OM.
Croes ta pone enfasis riba e responsabilidad di e autoridadnan n’e situacion actual: “Mi ta spera cu OM, Corte, Huez, y HOF awo realisa cu nan mes a tolera y permiti cu e situacion escala. Nan mes a cria e monsternan di bullying. E caso su number tabata: HAR-90/2023.
E impacto ribahenter comunidad
Croes ta skirbi cu e falta di accion di autoridadnan a duna Speed un “freehand” pa sigui bully henter Aruba y nan actitud ta contribui na un ambiente unda keho y abuso verbal no ta ricibi e atencion necesario.
“Mi ta spera cu tur hende realisa awo cu cada denuncia tin su motibo, y cu door di keda sin atende, boso mes a contribui na unda nos ta awe.” Entre varios victima di bully, tin mas di 20 of 30 keho entrega. Ningun a wordo atendi.
Esaki ta haci un yamada urgente pa autoridad pa reevalua nan decision ora ta trata di bully, smaad en laster, pasobra e consecuencianan di falta di accion por ta devastador pa esunnan envolvi.
