E asunto aki ta birando dia pa dia mas serio , locual ta inmoralidad sexual y chantahe sexual.
E asunto di cu un adulto ta tene relacion sexual cu un persona menor di edad, y despues e persona menor di edad, ta cuminsa saca placa for di dje pa no hibe polis.
Y tin biaha hasta e famia sabiendo cu e persona tin placa ta manda nan yiu exigi placa, pa asina nan tur por probecha y chantahia e persona.
Tin hopi hende casa, cu ta pasando den chantahe sexual, pasobra nan kier mantene nan matrimonio, y nan integridad.
E wega aki ta bay rond pa hopi tempo, y tin hende nan budget no ta cuadra, no cu nan no tin cen pero nan tin cu cumpli cu esun cu ta chantahia nan sexualmente sino, tur cos lo sali na cla.
Mucha menor di edad cu ta sinta tras di internet henter dia buscando forma pa traha placa ilegalmente ta usando tur tipo di bagamunderia pa asina yega na cen.
Hopi mayor no ta conciente cu nan mester sa, di unda e placa cu nan yiu menor di edad tin ta sali,
Basta kere den regalo,
Basta kere cu e mucha a gana catochi,
Na unda e mucha ta saca placa, pa cumpra Keds di marca,
Telefon caro,
Panja caro.
Joyas,
Huur auto hunto cu amigonan,
Haci fiesta na grandi,
Hasta fia amigo cu amiganan placa.
No tur ora ta benta di droga, no tur ora ta un Sugar Daddy of Sugar Mammie, no ta tur ora e guy cu e tin ta mantene, aunke esey tambe ta e bagamunderia grandi awendia, cu ta cambia freimento den bibamento cu otro, pasobra ta facil pa asunto sexual drenta entre hendenan cu ni conoce otro bon.
Pesey hopi relacion bao di hubentud awor aki, ta bira violento y vengativo, ora nan no por ta cu otro mas, pasobra e no tabata un simpel amistad, e tabata mas cu esey cu por wordo considera un chantahe sexual.
Hopi hende homber grandi y hende muher grandi cu ta kere cu ainda nan ta mucha, ta tene relacion cu hoben, y despues e hoben ta probecha di nan integridad, pasobra nan sa bon kico nan a haci y cuminsa saca placa for di e adulto ey na un forma cruel.
Hopi biaha pa mantene e supuesto bon nomber, integridad,posicion, y nan mantrimonio, nan ta hanja nan mes ta cumpli cu locual e persona aki menor di edad ta exigi.
Y awor e bagamunderia aki a bin ta tuma lugar den tur tipo di sexo.
E palabra di Dios ta bisa pa huy for di tur sorto di inmoralidad sexual, y awor tur hende por compronde dicon e palabra di Dios mester wordo respeta y hende mester tin temor di Dios.
Chantahia hende sexualmente a bira un arma popular di e enemigo, tin hopi biaha e cos aki ta caba na homicidio, of suicidio, y hasta salud mental di hende ta corre peliger, pasobra hende ta bao di un stress y depresion cu nan no por splica ta di unda e a bini.
Huy for di inmoralidad. Tur otro pica cu un hende comete ta pafo di e curpa. Ma e hende inmoral ta peca contra su mes curpa.( 1 Corintionan 6:18).
Pasobra esaki ta boluntad di Dios, boso santificacion,esta pa boso abstene, boso di inmoralidad sexual,pa cada uno di boso sabi di mantene su mes curpa den santificacion y honor. No cu pasion y deseonan carnal manera e paganonan cu no conoce Dios.( 1 Thesalonisensenan 4:3-5).
Huy for di tur sorto di inmoralidad sexual.
Sinceramente, Pastor Marcel Balootje
