ORANJESTAD – Diaranson Minister di Finansa a reuni cu e Fiscal Affairs Department di IMF. Tur aña durante IMF su Annual Meetings, Minister di Finansa ta tuma e oportunidad pa dialoga y pidi cooperacion di IMF pa asisti Aruba cu diferente trabou. Den e ultimo añanan IMF a bin ta brinda asistencia tecnico na Aruba riba, entre otro, reforma fiscal, gastonan di personal, maneho presupuestario y a ofrece diferente curso den cual Aruba por a participa. Fuera di e topiconan aki Minister Maduro a haci un peticion tambe pa asistencia di IMF pa yuda formula un maneho di debe den cual por organisa e pago di e debe externo di Pais Aruba na un forma responsabel. Riba e mesun dia Minister Maduro a reuni tambe cu e representante di Reino Hulandes na IMF, sr. Paul Hilbers. Durante un reunion ameno a repasa e peticionnan di Aruba pa asistencia di IMF, a brinda splicacion riba e situacion na Aruba y a toca e resultado di e evaluacion financiero y economico di Aruba haci e aña aki pa IMF den nan Article IV Mission. Na final di tur dos reunion Minister Maduro a expresa su gratitud di por conta cu e asistencia y bon cooperacion di IMF pa e trabounan cu ta necesario na bienestar di Pais Aruba.
