Impact Hub Aruba ta felicita tur teenpreneur cu a participa den e prome edicion di Future Founders Club; un showcase dinamico cu recientemente a tuma lugar na Impact Hub Aruba. E Demo Day a marca e culminacion di un bootcamp intensivo di tres dia, cu su meta principal pa inspira, capacita y empodera e proximo generacion di entrepreneurs y changemakers arubano. Future Founders Club ta un iniciativa dedica na brinda espacio, ‘skillset’ y crea un comunidad di hoben cu ambicion pa crea un futuro diferente, pa nan mes y pa nos isla.

Durante un bootcamp di 3 dia, e teenpreneurs a pasa den un trayecto educativo y practico cu ta inclui temanan manera:

  • Introduccion na Entrepreneurship
  • Mindset di identifica problema y crea solucion
  • Con pa prototype
  • Marketing y uso di media social
  • Preparacion di modelo di negoshi y Pitch

E programa a finalisa cu un ‘Demo Day’, cu a tuma lugar riba anochi final. Un total di 8 teenpreneurs a presenta nan solucion den forma di un modelo di negoshi. E modelonan di negoshi a varia entre plataformanan digital, solucionnan cu AI, diseño di hoya, producto di crochet, y solucion den industria di Cybersecurity. 

E programa a wordo sosteni pa un grupo di mentors y instructornan cu ta forma parti di e comunidad di Impact Hub Aruba. Durante e Demo Day por a conta cu lidernan den negoshi cu a presencia y demostra nan sosten na e futuro generacion di ‘founders’. E panel di invitadonan a haci pregunta na tur ‘Future Founder’, di cual cada participante a defende nan modelo di negoshi cu confiansa y claridad, demostrando comprendimento di negoshi, identifica problema den sociedad, crea solucionnan sostenibel, e balor cu nan idea ta ofrece, y con ta crea impacto den nos comunidad. 

Loke a destaca durante anochi ta e nivel di creatividad y nivel halto di preparacion, pasion y dedicacion cu cada teenpreneur a demostra. E presentacionnan a causa feedback impresionante cerca, mayornan, invitadonan y a confirma sin duda cu e hubentud di Aruba tin potencial grandi pa innovacion, liderazgo y desasaroyo empresararial. Mester remarca cu algun di e participantenan ya ta activo cu nan compania den e ultimo aña y ta generando entrada. Esaki ta di admira y ta demostra cu, cu pasion, dedicacion y guia correcto, nos hobennan ta capacita pa traha riba nan meta y logra resultadonan real den un etapa trempan di nan bida. 

Impact Hub Aruba ta compromete pa sigui crea espacionan inspiracional y educativo pa cu teenpreneurs di Aruba y sigui stimula crecimento, desaroyo y creacion di impacto positivo den nos comunidad. 

Impact Hub Aruba ta gradici PKF Dutch Caribbean & Suriname, cu e demostra liderazgo den apoyo di Aruba su ‘Teenpreneurs’. Un gradicimento grandi ta bay na tur miembro di Impact Hub Aruba cu a dedica nan tempo y contribui cu nan conocimento na e generacion nobo di ‘founders’ y ‘changemakers’ di Aruba. Pa finalisa Impact Hub Aruba ta hopi orguyoso di cada ‘Future Founder’ di nan energia y compromiso na crea nan modelo di negoshi.