Deporte en General
Deporte hopi biaha tin un posicion clave riba agenda personal di hopi persona, pero tambe riba esun social. Riba nivel personal e ta liga cu emocion y ta un guia importante den bida. Deporte tambe tin un balor social. E ta percura pa integracion, socialisacion y por refleha relacion social. Alabes e ta duna hobennan e posibilidad pa haya nan caminda den un sociedad. E ta crea un network, confiansa den su mes y den otronan, locual ta conduci na un kapital social, ambos riba nivel individual como tambe riba nivel social. Tur miembro di nos sociedad, di mucha te na esnan riba 60 aña, mester por tin e oportunidad pa por practica deporte.
Pa un bon maneho, uzo y desaroyo di deporte ta imperativo pa tin un maneho integral, interministerial y inter-departamental, ya cu deporte ta directamente liga na Salubridad Publico, e desaroyo Socio-Economico di un pais, Enseñansa, Infrastructura y Husticia.
Areanan di atencion: Piramide Deportivo
Ta importante pa stimula / motiva, promociona, engrandece y enrikece tur e diferente areanan deportivo di e Piramide Deportivo, cualnan ta e deportenan masivo, recreativo, escolar y topsport/elite. Alabes mester crea conscientisacion di e importancia cu deporte tin relaciona cu nos salud, ambos fisico y mental. IBISA mester tin un rol central den esaki. Federacionnan, ambos miembro y no-miembro di sea Aruba Sport Unie (ASU) of Comite Olimpico Aruba (COA), mester por haya e sosten maximo pa por desaroya e practica di nan deportenan.
Deporte y Salburidad Publico
Deportenan fisico tin un influencia directo riba salud fisico di e ser humano (p.e. nan ta combati enfermedadnan cronico).
Deportenan mental tin un influencia grandi riba bo desaroyo cognitivo cu ta preveni y alivia cierto malesa (p.e. demencia, ADD/ ADHD, depresion y adiccion).
Deportistanan en general tin bon bista riba nan nutricion, aunke tin un diferencia entre deportenan fisico y mental, mientras hopi biaha e disciplina dietario ta liga na si bo ta practica un deporte riba nivel recreacional of competitivo.
Deporte y nos Desaroyo Socio-Economico
Nation Building
E sentimento di unidad nacional ta directamente liga na Nation Building. Banda di religion, deporte ta e unico “hilo” cu ta uni hende y ta yuda desaroya e sentimento di unidad. E ta construi y defini e caracter di un nacion y ta yuda cualidadnan manera disciplina, determinacion, teamwork y un pasion pa fitness den e psyche (“totalidad di e mente humano”) di un nacion. E ta yuda guia e hubentud den e direccion adecua, ta yuda den construi infrastructura y ta crea un comunidad global.
Nation Branding
Nation Branding ta un proceso unda e imagen di un pais por ser crea, monitoria, evalua y proactivamente maneha pa mehora of engrandece e reputacion di un pais na un publico (di enfoke) internacional. Esaki por ta un reto pa paisnan den desaroyo (p.e. Small Island Development States). Deporte ta ser mira como un instrumento pa Nation Branding. Esaki especialmente pa deportenan den cual e pais ta resalta y ta saca bon resultado. E por bira e imagen di un pais, sea un deporte specifico, of (un) individuo(nan) cu ta resalta internacionalmente den un ramo di deporte.
Centro/Hub Deportivo den Caribe
Aruba tin e infrastructura presente pa por organisa eventonan deportivo grandi (proyectonan innovativo y hasta Mega- Events) cu por aporta na nos desaroyo economico (e.o. turismo) y na e concepto di Nation Branding. Aruba tin un bentaha grandi riba otro paisnan den Caribe relaciona cu su accesibilidad aereo facil, un clima favorabel henter aña, criminalidad abou, y stabilidad politico.
Pa haya sa mas di e plan di Deporte di Accion21, por lesa esaki riba website www.accion21.com
