Banco Central di Aruba (BCA) a conclui e encuesta di percepcion di negoshi pa e promer trimester di 2025. E encuesta di percepcion di negoshi ta evalua e percepcion economico di e negoshinan local.
E asina yama ‘Business Perception Index’, cu ta consisti di e indicenan di condicion economico a corto plaso y condicion economico actual, a baha for di 107,8 den e cuater trimester di 2024 te na 102,0 den e promer trimester di 2025 (mira Grafico 1).
Grafico 1: ‘Business Perception Index’.
Fuente: Banco Central di Aruba
E indice di condicion economico a corto plaso y indice di condicion economico actual a baha cu 9,7 punto di indice y 2,7 punto di indice te na 98,1 y 105,1, respectivamente, den e promer trimester di 2025 (mira Grafico 2).
Grafico 2: Resultado di Condicion Economico actual y Condicion Economico a corto plaso durante e promer trimester di 2025.
Fuente: Banco Central di Aruba
E expectativa pa locual ta crecemento economico, mitar di negoshi encuesta ta anticipa un crecemento economico flat den e siguiente 12 lunanan (mira Grafico 3).
Grafico 3: Expectativa di crecemento economico den e siguiente 12 luna.
Fuente: Banco Central di Aruba
Durante e promer trimester di 2025, e porcentahe di negoshi encuesta indicando “ningun cambio” den empleo a subi cu 15,4 punto di porcentahe te na 52,1%. E porcentahe di negoshi encuesta cu a raporta un “ganashi” a subi cu 12,2 punto di porcentahe te na 93,8% den e promer trimester di 2025. E porcentahe di negoshi encuesta indicando “mehoracion” den e condicion economico actual di inversion a baha cu 7,5 punto di porcentahe te na 35,4% den e promer trimester di 2025. Encuanto condicion economico a largo plaso pa e siguiente 12 lunanan, 43,8% ta anticipa cu e tasa di inflacion lo ta mas cu 3% den e promer trimester di 2025.
E relato completo di e encuesta di percepcion di negoshi ta disponibel ariba website di BCA www.cbaruba.org
Banco Central di Aruba
17 juli 2025
Tocante Banco Central di Aruba
E proposito principal di Banco Central di Aruba (BCA) ta pa contribui na stabilidad financiero y prosperidad economico di comunidad di Aruba. BCA ta logra e mision aki door di implementa un maneho monetario efectivo dirigi na mantene stabilidad di balor di e florin, promove e solides y integridad di e sistema financiero y yuda mantene un sistema di pago eficiente y confiabel.
Banda di su tareanan principal, BCA ta encarga cu emision di biyete di florin y moneda di florin y ta e bankero di gobierno. Ademas e ta regula e transaccionnan di pago cu exterior y ta administra e divisanan di Aruba y ta controla e uzo di esaki.
Pa mas informacion tocante Banco Central di Aruba, por bishita su website www.cbaruba.org
