Oficina Central di Estadistica (CBS) a presenta e resultadonan principal di e Indice di Prijs di Consumo (CPI) pa luna di December 2025. E cifranan ta indica un subida leve den prijsnan di consumo compara cu e luna anterior, impulsa principalmente pa sectornan di recreacion y hotel.
Inflacion y CPI General Pa luna di December 2025, e CPI a registra na 109.47, locual ta representa un subida di 0.4% compara cu November 2025 (109.03). Si compara esaki cu e mesun periodo un aña pasa, e cambio di CPI pa e ultimo diesdos lunanan (December 2024 te December 2025) tambe ta mustra un subida di 0.4%. Esaki ta nifica un aumento di 0.1 punto di porcentahe compara cu e periodo corespondiente di e aña anterior.
E promedio anual di e tasa di inflacion pa e ultimo 24 luna ta situa na 0.1%, mustrando un caida significativo di 1.6 punto di porcentahe compara cu e 1.7% registra den e periodonan anterior.
Cambio den Sectornan Diferente sector a hunga un rol den e subida aki. E sector di “Recreacion y cultura” a conoce un aumento di 1.6%, causa principalmente pa un subida di 11.7% den e categoria di vacacion. E sector di “Restaurant y hotel” a subi cu 1.8%, unda e categoria di servicio di alohamento a lanta cabes cu un subida drastico di 52.2%. Tambe e sector di “Restante bienes y servicio” a subi cu 1.0%.
Di otro banda, algun sector a yuda contraresta e subidanan aki. “Comunicacion” a baha cu 0.4% debi na un caida den prijs di ekipo di telefon y fax. “Transporte” tambe a baha levemente cu 0.2%, principalmente door di un reduccion den prijs pa compra di vehiculo (-3.7%).
Bestaansminimum E costo pa biba (bestaansminimum) tambe a conoce un aumento. Pa un hogar cu ta consisti di dos adulto y dos mucha, e bestaansminimum na December 2025 a yega Afl. 5,537, un subida di Afl. 18 compara cu luna anterior. Pa un hogar di un solo adulto, e suma aki a bira Afl. 2,636, un aumento di Afl. 8.
Petroleo y Utilidad E prijs internacional di petroleo a baha cu 3.3% na December, yegando un promedio di US$ 58.02 pa bari. Sinembargo, na Aruba, prijs di gasolin a subi cu 2.00 cent (+0.9%) y diesel a subi cu 8.50 cent (+4.3%). E tarifanan pa electricidad y awa a keda stabiel compara cu November 2025.
Canasta di Cuminda E indice di cuminda y servicio di catering a subi cu 0.2%. Cuminda pa consumo na cas a bira mas caro, cu subidanan remarcabel den categoria di fruta (+3.5%) y batata, yuca y batata dushi (+2.2%). Di otro banda, e categoria di pisca y cuminda di lama a conoce un caida di prijs di 2.2%.
E cifranan aki ta duna un bista cla di e desaroyo economico y e costo di bida na Aruba na ciere di aña 2025.
