Recientemente Crisis Team a introduci cambionan na nos frontera cu ta regla admision di residentenan regresando Aruba for di exterior.
Pa pasaheronan pa Aruba cu ta vacuna of getest, lo siguiente ta aplicabel:
Pasaheronan cu ta vacuna
Residentenan cuminsando for di 18 aña cu tin e ‘Boostershot’ no mester test ora di drenta Aruba. Cu ‘Boostershot’ ta referi na e di 3 vacuna di Pfizer of e di 2 vacuna di Johnson & Johnson. Mester upload e certificado di vacuna durante e online registration na www.edcardaruba.aw dentro di tres dia prome cu e vuelo pa Aruba.
Residentenan cuminsando for di 18 aña cu nunca a vacuna of cu no tin e “Boostershot” lo mester test pa drenta Aruba. Si haci e test den exterior, por scoge entre un PCR test (no mas cu 3 dia bieu) of un ANTIGEN test (no mas cu 1 dia bieu). Lo mester upload e resultado negativo di e test durante e online registration na www.edcardaruba.aw prome cu e biahe pa Aruba.
Envez di haci un test den exterior, residentenan por opta pa haci un PCR test na Aruba, ora di yegada na aeropuerto. E ora mester indica esaki y paga pa e test (US$ 75,00) durante registracion na www.edcardaruba.aw (dentro di tres dia prome cu e vuelo pa Aruba).
Otro puntonan pa tene cuenta cune
Mucha residente entre 12 cu 17 aña cu tin 2 vacuna di Pfizer NO mester test pa drenta Aruba pero mucha entre 12 cu 17 aña cu tin unicamente 1 vacuna di Pfizer, SI mester test.
Mucha residente entre 0 cu 11 aña NO mester test bou ningun circunstancia pa por drenta Aruba.
Ta recomenda pa semper biaha cu un printout di certificado di vacuna, test result (segun aplicabel) y e “Qualifed to Board” statement cu ta haya despues di registracion na www.edcardaruba.aw.
Crisis Team ta pidi residentenan cu ta planeando pa biaha y/of tambe residentenan cu ta regresando Aruba pa tene bon cuenta cu e cambionan cu ta na vigor na nos frontera. E cambionan ta conta pa tur hende sin excepcion. Si como residente bo persona no ta desea di gasta placa na test, ta recomenda pa bo vacuna na tempo. Tambe ta conseha esnan cu no ta desea di vacuna pa incorpora e gasto di test pa drenta Aruba den nan presupuesto na momento di biaha.
