E compromiso di Gabinete AVP- Futuro ta di sigui cumpli cu e bon comun y e necesidad di e pueblo. Prome Minister mr. Mike Eman durante encuentro cu un grupo grandi di ciudadano na MFA Paradera, a hiba palabra y fortalece e compromiso cu e iniciativa di ley, e ‘uitkering’ nobo pa Muchanan cu tin mester di cuido intensivo.
Gabinete AVP-Futuro ta sigui mira unda por brinda sosten na e pueblo, con por debolbe y/o aumenta asistencia necesario y alivia e preocupacion cu hopi ta carga. Como parti di e iniciativa di ley, e parti financiero, aunke na dje tin un terminologia na Hulandes ‘wetgevenig … werkomgeving …. normeren’ , fuera cu e ta crea e finansas, e echo cu e wetgeving ta existi, tin un refleho den comunidad cu e tema aki a haya un prioridad nobo. Banda di e ‘normerend effect’ cu e tin, si noh gobierno no lo a traha riba dje.
Dun’e e prioridad cu e merece, ta locual Premier Eman a expresa.
Un mensahe na e comunidad, na mayornan cu muchanan special ta algo di alto prioridad pa e pais aki.
Bianca Spaai ta pedagoog na Fundacion Oasis of Love cu ta carga e proyecto Centro pa Desaroyo di Mucha. E fundacion aki ta relativamente nobo, cu a inicia den luna di januari y cu ta duna intervencion inmediato. Parti mainta ta duna guia na e parti di desaroyo, parti atardi ta fungi como Trai Merdia.
Bianca su deseo ta di mira e iniciativa di ley aki drenta na vigor pronto. Ta consciente cu e mayornan tin’e dificil. Nan tin hopi gasto, hopi cuido envolvi y e parti financiero ta pisa grandemente riba nan.
Un iniciativa di ley cu a spera riba dje pa basta tempo y cu porfin lo mira luz di dia, ta locual Lucemio Wilfrido Kelly a duna di conoce durante anochi informativo na MFA Paradera. E lo ta un sosten grandi na mayornan cu yiunan cu necesidad pa cuido intensivo.
E ayudo hopi biaha ta depende di e grado di incapacidad cu e mucha/yiu tin. Algun ta varia den servicio / atencion cu nan ta rekeri. Algun mester scol special, logopidist, transporte, cuido special y tur ta gastonan cu mayor y famia hunto ta carga pero asina mes no ta suficiente.
Kelly personalmente tin hopi tempo ta curbi casto di un familiar, a cana e caminda cerca tur instancia y nunca a ricibi ayudo. E ta un lastima, mirando cu si a ricibi e ayudo for di prome instante, e desaroyo di e mucha lo tabata mas avansa. E luz cu ta mira na horizonte, ta e logopidist cu lo keda cubri y ta spera cu e gobierno aki por logra esaki. Particularmente muchanan cu tin dificultad cu habla.
Arthuro ‘Tuyo’ Werleman ademas di su conexion directo cu guia y cuido na muchanan cu incapacidad, a aporta na e prome iniciativa di ley bou Minister Armand Engelbrecht e den pasado. E biaha aki tampoco no tabata un excepcion, el a keda acerca na 2021 pa Prome Minister Mike Eman pa brinda su conseho cu e concepto di ley en cuestion.
E ta un bon iniciativa, contento di mira cu e ta asina leu y cu hopi posibilidad di bira un realidad pronto. Werleman ta haya e sesion di informacionnan aki sumamente importante, a mira reaccion skerpi di e mayornan presente, cu hopi pregunta, caminda a vocifera nan dolornan.
A base di locual ta bin dilanti ta haya sa unda e buraconan den cuido ta manifesta. Ademas di e grupo aki, tin di tene na cuenta tambe esnan cu autismo cu tambe ta den necesidad di personal capacita den cuido y guia, como tambe scol. Lo ta ideal si por bin cu un comission encarga cu studia e buraconan aki y asina presenta solucion den largo plaso.
