Recientemente a tuma luga apertura di ‘The Galleria’ na Harbour House situa den Weststraat. ‘The Galleria’ ta un iniciativa di Harbour House y Pering Group pa sostene nos artistanan local door di ofrece cada artista un Pop-up galeria pa expone nan arte na bishitantenan como tambe na comunidad di Aruba. Durante apertura, Sr. Alberto Perret-Gentil, CEO di Pering Group, a splica cu e vision di Pering Group ta pa contribui na e caya di Weststraat y Werfstraat como un destinacion di arte pa atrae turista y localnan bek den downtown di Oranjestad. E vision aki ta basa riba e ideologia di ‘Orange Economy’ como sosten adicional na e ‘Blue Economy’ di e area specifico aki. ‘Orange Economy’ su proposito ta pa stimula economia basa riba actividadnan creativo cu contenido cultural y artistico.
E artistanan cu lo ta exponiendo nan arte den e prome temporada di ‘The Galleria’ ta Armando Goedgedrag, Cado de Lannoy, Suelyn Dankerlui, The Art Spot by Nicole & Marie, Luque Juan, Federico Cabello, Rudyomar Leysner y Erika Moran. Cada artista a splica un poco di nan trabou y a expresa nan gratitud pa ricibi e oportunidad aki y di un manera of otro contribui na revitalisacion di Oranjestad. Pa mas informacion por bishita ‘The Galleria’ of tuma contacto cu cada artista via nan red social.
