Caba cu hamber ta dentro di nos alcance. Mundo ta produci suficiente cuminda pa alimenta tur hende caba, toch 645 miyon hende ainda ta enfrenta hamber, y 2.69 biyon no por paga pa un dieta saludabel. Mientras cu conflicto, instabilidad economico y shocknan climatico ta pone presion riba sistemanan agro-alimentario, e reto ta con pa sigura acceso na cuminda confiabel, pagabel y nutritivo pa tur hende na mundo.
Innovacion ta transformando con cuminda ta wordo produci
wordo transporta y comercialisa.
E ta trece hunto avancenan den ciencia y technologia cu e conocemento, experiencia y ingenio di Agricultor, Piscado, Criadonanan y esnan cu ta traha cu mondi incluyendo muher, hoben y Pueblonan Indigena como tambe inversionistanan, esnan cu ta haci maneho y emprendedonan, pasobra pa transforma nos sistemanan agro-alimentario nos mester accion colectivo
Innovacion den sistemanan agro-alimentario ta bin den hopi forma
E ta inclui servicio di conseho digital, sistemanan di data y informacion, variedad di simia mehora y biotechnologia, hunto cu scol di tereno pa agricultor, modelo cooperativo, practicanan tradicional di tera y awa, y manera nobo pa produccion, mercado, finanzas y distribucion. Inovacion por nifica tambe reduci riesgo prome cu crisis bin dilanti; acercamento preventivo y di diferente sector por fortalece resiliencia y evita gasto mucho mas halto despues cu un shock sosode.
Hunto, nos esfuersonan pa fomenta inovacion por construi sistemanan agro-alimentario cu ta mas stabil, mas inclusivo y mas resiliente – capaz pa alimenta hende awe mientras nos ta proteha e recursonan cu generacionnan futuro ta depende di dje.
Tur hende tin un rol pa hunga
Pa traduci inovacion den impacto nos mester partnership y inversion. Gobierno tin un rol central den crea e condicionnan pa exito – invertiendo den investigacion, fortaleciendo infrastructura rural y poniendo maneho cu ta expande acceso na inovacion di manera responsabel. Sector priva ta contribui atraves di mobiliza inversion, fortalece cadenanan di suministro y crea trabou y modelo nobo di negoshi cu solucionnan escalabel cu ta yega na poblacionnan cu ta menos sirbi. Partnershipnan entre institucionnan academico y di investigacion, sociedad civil, gruponan di productor, Sistema di Nacionnan Uni y otro actornan di desaroyo, ta esencial pa move solucionnan for di investigacion pa accion.
Santa Rosa, Innovacion y Aruba
Kisas e lo mester bira un programa startegico?“Innova Awe, Alimenta Mañan”. E iniciativa aki ta marca un paso decisivo pa fortalece nos siguridad alimentario, reduci dependencia riba importacion, y crea oportunidad sostenibel pa nos agricultor, criado y piscadonan local.
Den un mundo caminda cambio climatico y cadena di suministro global ta pone presion riba disponibilidad di cuminda, Aruba ta scohe pa inverti den su mesun tera y hende. E programa ta construi riba cuater pilar fundamental:
INOVACION DEN AGRICULTURA
Implementacion di sistemanan moderno di hydroponico y aquaponico cu ta uza 90% menos awa. Laboratorio nobo na Santa Rosa lo ofrece training practico y acceso na simia adapta pa clima di Aruba.
SOSTEN PA CRIADO Y PISCADO
Fondo di sosten y programa di Veterinario mobil, hunto cu cooperacion nobo pa Piscado Artesanal pa fria y distribui nan captura localmente cu calidad halto.
EDUCACION PA HUBENTUD
Curiculo nobo “AgriTech Hubentud” den scol secundario y stage paga na Santa Rosa. Nos kier pa hubentud mira agricultura como un carera moderno, tecnologico y orguyoso.
CONECCION DIRECTO
Sigui mantene Mercado Santa Rosa y plataforma digital “Come Local” pa conecta agricultor directamente cu restaurant, hotel y consumidonan sin intermediario.
“Nos no ta planta solamente mata; nos ta planta futuro. Cada sistema hydroponico, cada hoben cu siña, cada piscado cu nos sostene, ta un inversion den nos autonomia. Innova Awe, Alimenta Mayan no ta un slogan, ta nos compromiso.”
