Dialuna a tuma lugar un reunion di parlamento unda a trata e ley di FASE. Manera ta conoci, ora cu Pandemia a bati na porta, Gobierno a bay over na duna ayudo di FASE, pero na e momento ey tabata imposibel pa traha riba e ley.
Enberdad e proceso a tarda, y esaki ta debi na escases di profesionalnan cu ta traha y skiribi ley.
Sinembargo, awor e ley a yega parlamento y mester wordo aporba of desaporba.
Partido MEP y RAIZ a sostene e ley aki, envista cu FASE a brinda su ayudo na pueblo ne momento cu mas nan tabatin mester di dje.
Otro partidonan AVP, Marisol y Mansur ta pensa otro. Nan kier crusifica Gobierno, Minister y te hasta esnan cu cobra FASE.
Ta simpel, si e ley no pasa, kemen cu tur esnan cu a cobra FASE, mester entrega e placa bek.
Sorpresivamente a bin resulta cu e hamber pa maldad y poder ta hopi grandi cerca AVP y Marisol, comoquiera cu nan a vota contra.
Pues, nan no kier legalisa FASE y si no legalisa FASE, esey kemen cu tur hende cu a cobra, lo mester page bek.
Ta di lamenta e postura cu AVP y Marisol a tuma, pa bay contra FASE, pasobra hopi nan mes votadornan tambe a cobra FASE.
Covid-19 no ta algo pa haci wega politico cune. Cu e proceso di FASE por tabatin cierto puntonan cu tabata falta, por ehempel, un beroep, si encaso un persona wordo nenga, tur esey ta consehonan positivo cu ARA a duna.
Pero tampoco ta asina cu ambtenaarnan a cobra FASE, cu Defunto a cobra FASE cu hendenan cu ta biba den exterior a cobra FASE. Eseynan ta casi imposibel y ta grito politico! Unda e prueba ta ? Ora puntra AVP, nan no tin contesta.
Pues, resumiendo mester bisa cu awor FASE a keda legalisa. El’a tarda? Si el’a tarda, pasobra Aruba no tin suficiente persona na trabao cu experticio pa skibri ley. Cu a sosode algo malo cu FASE? NO! Un total di 11 mil persona a cobra FASE entre Maart 2020 cu Febuari 2021.
