Oranjestad – Den un momento historico den corte, Luenne Gomez-Pieters, director di DIMP (Departamento di Impuesto), a demostra curashi i profesionalismo dor di defende su mes su departamento sin abogado durante e audiencia riba e caso di Mike de Meza.
E situacion tabatin un historia complica, ya cu anteriormente DIMP tabata conta cu un abogado for di Curaçao pa representanan. Sinembargo, despues di menasanan formal, presion politico y yamadanan di telefon histerico, e abogado a retira. Pero Gomez-Pieters no a dobla.
Den corte, aparte di tabata compaña pa huristanan di Gobierno, e inspectora mes a presenta su argumentonan claro i firme, sin miedo i sin debilidad. Gomez-Pieters a splica detayadamente conforme e ley, enfatisando cu DIMP a cumpli cu tur exigencianan legal den e caso di De Meza.
E hecho cu e mes a para defende su departamento ta un señal di integridad i liderazgo. E directora mes, cara a cara cu e corte, defendiendo e transparencia di DIMP.
E decision di Gomez-Pieters di hiba e caso su mes ta manda un mensahe fuerte: DIMP no ta na man di influencia externo. Ni partidonan politico, ni criticanan, ni abogadonan di otro pais lo a cambia e realidad fiscal.
E hecho tambe ta mustra cu e director tin fe den e trabou di su equipo i no tin miedo pa asumi responsabilidad personalmente. Esaki ta un ehemplo di servicio publico cu honor.
Conclucion: Respet!
Luenne Gomez-Pieters a proba cu e ley no ta pa haci wega i cu e departamento di impuesto no ta permiti cu politico of presion social influencia nan decisionnan.
E pueblo ta mira i awor e pregunta ta: Ken por discuti cu e mesun firmeza manera e inspectora a mustra?
DIMP no ta dobla, i Gomez-Pieters tampoco.
