Luna pasá a keda instalá como raadsheer, es decir juez di corte di apelashon, na Hulanda mr dr. Zayènne van Heesen-Laclé (Aruba, 1979). E instalashon a tuma lugar durante un seshon extraordinario di Corte di Apelashon di ‘s-Hertogenbosch dia 15 di oktober ultimo. Famia y amistadnan cercá di Zayènne van Heesen-Laclé tawata presente pa celebra cuné e etapa nobo aki den su carera juridico.
Van Heesen-Laclé a cuminsa su carera juridico na facultad di derecho na Universidad di Leiden despues di a gradua na 2003 na dicho facultad. Despues di finaliza su thesis di doctorado na 2007, Van Heesen-Laclé a traha
como abogado. Prome na e oficina NautaDutilh Amsterdam y seguidamente na e bufete di abogado di Provincia Noord-Holland (PNH Advocaten) na Haarlem. Na 2019 Van Heesen-Laclé a inicia su carera judicial. Durante di dos aña Van Heesen-Laclé a haña e oportunidad pa traha y practica na diferente instancia judicial, entre cual tribunal di Oost-Brabant, corte di apelashon di ‘s-Hertogenbosch y Corte Supremo na Den Haag como parti di du educashon judicial (rhio-opleiding). Na september di e aña aki Van Heesen-Laclé a finaliza dicho educashon y entrante 1 di oktober 2021 Van Heesen-Laclé a keda apuntá a base di Decreto Real como juez na Corte di Apelashon di ‘s-Hertogenbosch, na departamento di casonan comercial civil.
Durante di e seshon di instalashon, presidente di Corte di Apelashon di ‘s-Hertogenbosch a memora cu Zayènne van Heesen-Laclé, for di tempo cu e tawata estudiante te cu actualmente a dedica gran parti di su tempo liber na su isla natal Aruba. Formando parti di diferente directiva, entre otro Societas Iuridica Antiliana et Arubana (SIAA), Overlegorgaan Caraïbische Nederlanders (OCaN), Stichting ABC Advies y Genootschap Nederland-Aruba (GNA).
Otro tópiconan cu a ser trata durante di e charla di presidente di hof y procureur-generaal di ressort ‘s-Hertogenbosch durante e ceremonia di instalashon, tawata e retonan cu e sistema judicial ta enfrentando, entre otro e pandemia actual, e necesidad pa keda enfoca ariba e dimension humano den desishonnan di corte y e efectonan pa e estado di derecho despues di e asesinatonan tragico di abogado Van Wiersum y e periodista Peter R. de Vries. Por ultimo e deken di orden di abogado di ressort Den Bosch a illustra e discushon actual encuanto e uso di terminologia Hulandes masculino pa juez di Apelashon (raadsheer) den un era moderno den cual inclusividad ta requeri un termino neutral.
