Dios a crea tur hende segun Su mes imagen y semehansa, ningun hende no tin derechi di rebaha otro, lastra otro, y perhudica otro, pesey Dios a instala un regla di oro den Su palabra bisando:
Pesey tur loke boso kier pa hende haci pa boso,haci mescos pa nan, pasobra esaki ta ley y profetanan.
( Mateo 7:12).
Ta hopi tristo ora hende ta papia malo, insulta y menosprecia su propio hendenan di cas, bisando cu e tin yiu cu no ta sirbi, casa cu no ta bal nada, y na e momento ey bo ta haci e pregunta, con por ta cu tur hende ta malo y abo so ta bon?
Si un yiu no ta sirbi, conta cu su mama y su tata, no ta nan deber di a lante den un bon caminda , y pa awe nan mes no ta papiando malo sino bon di nan propio yiu?
Esun cu ta papia malo di su esposa/esposo ta papia malo di su mes pasobra dilanti di Dios , boso ta un solo carni.
Pesey e mundo ta bisa un palabra cu esun cu scupi na laira e ta bin cay den su mes cara.
Ta kico a pasa cu hende ta insulta otro asina tanto, kibra otro di un forma hopi baho, manera nan ta lubida, cu e persona ey tambe ta hende, e tambe tin famia, e tambe tin un cara, e tipo di conducta y actuacion asina ta bini totalmente for di mundo di scuridad.
Un hende por tin tur cos bunita, pero si e ta negativo, y malicioso, e mes ta kibra su mes, pasobra bo ta haci tur esfuerso pa lanta un cas cu bo man, pero cu bo boca negativo bo ta kibra tur cos.
Palabra negativo ta kibra famia, kibra negoshi, kibra amistad, y percura pa rabia , odio y falta di pordon, pasobra palabra negativo ta sali for di curason di hende negativo.
E bon hende for di e bon tesoro di su curason, ta saca loke ta bon, y e mal hende, for di e mal tesoro, ta saca loke ta malo: pasobra for di e abundancia di curason su boca ta papia.
Si bo tin un auto y bo mes ta baha su balor, bisando tur dia cu e auto ey ta malo,bo ta bay cosecha locual bo ta sembrando.
Si tur dia un hende ta lanta murmura, papia malo, nada no ta bon, e no sa di ta gradecido den nada, e hende ey ta bay cosecha amargura.
Si un hende ta kere cu e ta religioso, y toch no ta frena su lenga, ma ta ganja su mes curason,e hende aki su religion ta sin balor. ( Santiago 1:26).
Lipnan cu ta papia berdad lo ta estableci pa semper, ma un lenga mentiroso ta pa un momento so.( Proverbionan 12:19).
Ma awor boso tambe mester pone tur esakinan un banda, rabia, furia, malisia,calumnia y palabra sushi for di boso boca. ( Colosensenan 3:8).
Laga esun cu kier stima bida, y mira dianan bon,frena su lenga di loke ta maldad,y su lipnan di papia enganjo, laga e aparta su mes di maldad y haci bon, lage busca pas y sigui’e. ( 1 Pedro 3:10).
No pagando malo cu malo,of insulto cu insulto, ma mas bien,dunando un bendicion, pasobra boso a wordo yama pa e proposito aki, pa boso por hereda un bendicion.( 1 Pedro 3:9).
Dios ta amor , y Dios a duna nos orden pa stima otro, no pa kibra of difama otro.
Laga den tur cas di famia, tin amor y union.
Sinceramente, Pastor Marcel Balootje
