Nada y ningun hende por kibra e berdadero amor,cu Dios a pone den curason di esnan cu ta stima otro.
Hopi hende ta kere cu cas grandi, varios auto, bon trabao, hopi placa, bon tipo, curpa sexy, esey ta locual ta trece felicidad. Ta berdad nan ta parti di bida, pero felicidad no ta depende di cosnan carnal y material.
Un cas grandi luho, pero den dje abuso verbal y fisico ta tuma lugar no ta garantia di un bida feliz.
Si cada ken tin nan auto esey no ta nifica cu tur cos ta bon entre nan dos dos.
Si cada un tin un bon trabao, y placa no ta haci falta den cas, tampoco ta garantia di un matrimiono stabiel.
Hende mes ta trece negativismo den nan bida, pasobra nan ta bisa, no tin matrimonio perfecto, no tin homber fiel, tur muher ta gusta pleita etc.
Locual hende ta proclama cu nan boca esey nan ta ricibi,por ehempel si bo cumpra un auto nobo, y bo mes bisa cu e marca di auto ey no ta bon, pronto lo bo tin problema cune, pasobra palabra negativo ta atrae actitud negativo.
Pero tin algo cu tur hende mester sa, cu matrimonio ta un mata cu mester hanja su awa na tempo, mester snoei su ramanan, mester dune su vitamina,mester ploeg e tera,y mas cu tur cos mester di proteccion contra pis pis.
Pis, pis, ta un insecto cu ta haci manera e no ta danino, pero poco, poco e ta caba cu e mata,
Asina ta ora un matrimonio tin mal amistad, sea di parti di e homber of parti di e muher, hende nan cu ta toxico pa e pareha, cu ta contra unidad, pero constantemente nan cabes ta den fiesta, paranda, gamble y corre caya. Amistad nan asina no ta bon pa ningun matrimonio.
Integridad den matrimonio, ta un sosten tanto pa e homber como e muher, pasobra Dios hunto cu nan dos, ta sostene nan integridad. Mas integro un pareha ta, mas bon ehempel y bon tesimonio nan por duna na nan yuinan y henter comunidad.
Integridad di e rectonan lo guia nan, ma perversidad di traidornan lo destrui nan.( Proverbionan 11:3).
Un nivel di integridad halto, hunto honestad, respet y decensia, ta pone cu ta dificil, pa adulterio,manipulacion y malicia por drenta e matrmonio.
Tanto hende homber como hende muher ta sinti nan mes sigur ora nan ta wordo respeta, pesey respet den un matrmonio tin mucho mas balor cu placa, ki bal la pena un hende tin hopi placa pero e ta rondona cu infieldad y inmoralidad.
Lipnan mentiroso ta un abominacion pa Senjor, ma esun cu ta trata cu fieldad ta Su delicia.( Proverbionan 12:22).
Laga integridad y rectitud wardami,pasobra mi ta spera riba Bo.( Salmo 25;21).
Mihor un pober cu ta cana den su integridad, cu esun cu ta perverso den su caminda, maske e ta rico.( Proverbionan 28:6).
Materialismo ta algo masha peligroso den bida di hende y especialmente den matrimonio, pasobra bo no por cumpra un hende su curason ,cu cos material pa e keda serca bo, amor ta amor berdadero,den bon tempo y den mal tempo, den tristesa y den alegria, hasta ora malesa presenta, amor tey pa cuida pa semper.
Riba tur cos keda ferviente den boso amor pa otro,pasobra amor ta cubri multitud di pica.( 1 Pedro 4:8).
Un tin nada mas dushi ora fieldad ta reina den un matrimonio, pasobra lo tin intimidad y amor de sobra, y henter famia lo beneficia, di e bendicion di Dios, den e hogar.
Sinceramente, Pastor Marcel Balootje
