Interes general ta bay prome cu tur cos; Ady Thijsen a trek in mocion di desconfiansa contra Marisol Lopez-Tromp

0
848

Presidente di Parlamento, Ady Thijsen a yama un conferencia di prensa cu caracter di urgencia den su despacho, caminda cu el a haci un declaracion pa nos comunidad.
Esaki ta den cuadro di un reunion extraordinario cu a tuma luga diamars anochi. Thijsen a splica cu como presidente di Staten, cu e ultimo desaroyonan cu a bin ta tuma luga, unda cu tabata tin decisionnan cu a cay. E decision pa retira minister Marisol Lopez-Tromp, di infrastructura, desaroyo teritorial y medio ambiente, a tuma luga y esey ta un hecho.
Gobierno a mand’e pa gobernador, gobernador a mand’e pa Parlamento. Nan tabata tin nan sentimento, a pone riba papel y esey a bay bek.
Gobernador a firm’e y esey tabata un hecho. Pero a keda un discusion den comunidad encuanto e mocion di desconfiansa.

Tin cuestion di interpretacion.
Prome biaha cu e situacion pa Thijsen ta surgi den e sentido cu ta aplica articulo 27 reglement van orde, na momentonan di votacion. El a trece hopi discusion y intrankilidad den comunidad y a mishi e estado di derecho. Thijsen ta keda para riba su interpretacion cu e tin y den e caso aki specifico. Pero ta respeta otro opinion. Mirando e situacion cu ta aden, mirando e intrankilidad, Thijsen a tuma un decision. Su opinion ta cu na e momento aki, interes general ta bay prome cu tur cos.
Mester tin stabilidad, trankilidad den nos comunidad. Thijsen ta laga su decision un banda y scoge pa interpretacion pa cu ta wordo duna na articulo 27 reglement van orde, cu ta pa aplicabel na tur momento, cual sea e circunstancianan.
Esey ta nifica cu Thijsen ta trek in e decision cu el a tuma encuanto e mocionnan y ta declara nan nulo.
Esaki un biaha mas, den cuadro di interes general, stabilidad y trankilidad den nos comunidad.
Esaki ta determina tambe e punto di bista cu ta wordo manteni awo y pa futuro. E rechtzekerheid di e instituto di Parlamento mester wordo salvaguardia prome cu tur cos. Pasobra ora cu ta asumi un encargo, un posicion di presidente di Staten, cu ta tuma
decisionnan, ta para pa bo decisionnan. Pero mester corda semper cu nos ta biba den un comunidad, un estado di derecho ora cu
tin diferencia di opinion, por cuminsa bira un problema.

Den e caso aki, segun Thijsen, si ta un politico responsabel, bo opinion, bo ta lag’e un banda, bo tin cu pensa prome pa e comunidad cu ta den necesidad di e siguridad, trankilidad y tambe loke ta trata e parti caminda pueblo mester sinti cu e por kere den un Parlamento.
Esey a wordo mishi awo. E diferencia di opinion ey ta keda colga den laira. Ora cu ta den posicion asina, bo no ta sirbi bo mes, sino e pueblo. E no ta facil, segun Thijsen. Pero ta kere cu esey ta un bon decision cu e mester a tuma. Su interpretacion, ta keda para riba dje, como hurista, como presidente di Staten. Sinembargo e ta bira ondergeschikt na interes general. Ta pa e motibo ey mes, segun Thijsen, esey ta un bon cos pa haci, pa por sigui p’adilanti, pasobra tin hopi problema na e
momentonan aki.
E situacion no ta duna pa tin e intrankilidad den comunidad. Mester ta bon cla si, Thijsen a enfatisa.

Thijsen no lo kier laga e discusion e mocion di desconfiansa aki keda stroba e desaroyo di e pais. Comunidad no ta sinti’e bon mas den esaki. Un ta bringa cu otro, ken tin razon y ken no tin razon. Den esaki, Thijsen ta para pa loke e ta pensa aden, pero den bida, ora cu ta asumi posicion, e ora ey mester sa kico ta bin prome. Esey ta bay haci awo p’adilanti. Esey ta loke cu Thijsen lo haci te dia cu e no ta den e posicion aki mas.

Tin cu corda cu politiconan ta bin, politiconan ta bay, Parlamento si ta keda. Ken cu ta e presidente, mester cumpli cu regla, cu ley. Aunke e mester pensa cu mester bay na tal manera, pero mester corda cu interes general ta
bin prome cu tur cos.

LEAVE A REPLY

Please enter your comment!
Please enter your name here