Awe mainta den caso Flamingo a sigui cu interogacion di Eisia Esser riba e acusacionnan contra Eisia Esser, kende ta wordo acusa di ta complice di a wordo cumpra entre November 2017 – 2020. Tambe e ta wordo acusa di a tuma cosnan di Vito Croes y cu e ta complice di a mal usa su funcion. Tambe Hues a haci preguntanan na Otmar Oduber.
SOLO DI PUEBLO por a compronde cu Esser a desmenti tur e acusacionnan y Otmar a bisa Hues cu e traduccion di Papiamento na Hulandes ta mal haci. Ta asina cu e traductor di Corte a bay analisa e declaracion y a bisa Hues cu por interpreta e palabra “nos” den dos manera.
ESSER TA NENGA
Hues a haci Esser un cantidad di pregunta tocante su trabao serca Otmar Oduber. Esser a bisa cu el a traha 30 aña pa Gobierno y ta un ambtenaar. El a bisa cu entre 2017 y 2020, el a traha pa Otmar y tabata na disposicion di Otmar cu tabata minister. E tabata encarga pa atende tur hende, cu tin un of otro problema. El a bisa cu e tabata traha cu otro dos persona. El a bisa cu tur su cosnan el a traha den computer y no tabata informa Otmar. Esser a bisa cu ta su cosnan personal di su trabao e informacionnan cu Landsrecherche a confisca. Hues a puntra Otmar si e tabata sa di e anotacionnan. Otmar a bisa cu e no tabata na altura di e informacionnan aki. Hues a presenta un di e informacionnan cu diferente nomber. Tin anotacion: “esaki ta pa wak si Andin Bikker por yuda nos”. Hues a puntra pakico ta papia di nos. Esser a splica cu na Aruba ta papia asina esta di nos. Hues a mustra otro pagina caminda ta blo menciona Otmar. Segun Esser el a skirbi tur informacion di hende cu ta bin pa Otmar. Hues a puntra Otmar riba esaki y Otmar a bisa cu hopi hende kier papia cun’e y pesey tin Esser cu ta papia y yuda hendenan sin cu nan tin cu bay serca Otmar.
TRADUCCION NO CORECTO
Otmar a bisa cu e no tabata tuma decision manera ta acus’e. Otmar a bisa Hues cu e kier mira e documento original y no esnan traduci na Hulandes. Otmar ta haya cu hopi biaha tin problema cu e traduccion pasobra ta interpreta un cos pa otro. Na dado momento Hues a pidi e traductor di Corte, compara e declaracion na Papiamento, cu esun traduci na Hulandes. E traductor a tuma su tempo analisa y despues a bisa Hues cu e ultimo frase caminda ta papia di “nos” por wordo interpreta den dos manera. El a splica cu por ta papia di “nos como un grupo” of “nos como comunidad”. Hues a keda satisfecho cu e aclaracion aki.
Hues a puntra Otmar si e ta atende hendenan di su partido so. Otmar a splica cu e tabata atende tur hende, sin mira di cual partido, pero e no a tuma ningun decision pa ningun tereno. El a bisa cu tur cos tabata wordo dicidi den e reunion na DIP.
Hues a mustra cu tin un documento caminda ta para “team Esser, team campaña partido POR 2021”. Segun Esser eseynan ta nomber di conocirnan di dje pa añanan largo. Esser a sigui bisa cu algun di nan ta cu POR y otronan ta otro partido. Tin algun di nan ta skirbi, ta rabia nan tras. Esser a splica cu eseynan ta personanan cu ta rabia cu nan tin hopi aña ta warda riba Gobierno pero no a haya nada.
OTMAR TA YUDA HENDE PA HAYA TRABAO
Hues a mustra cu tin nomber di personanan ta wordo menciona cu lo a wordo beneficia. Hues a menciona R.v M cu a wordo interoga na Hues Comisario. El a busca un trabao serca Otmar. Segun Otmar, el a bisa R., pa haci un solicitud na BID. El a bisa cu e tabata haci “follow up” cu e hendenan pa asina nan sa con ta para cu nan peticionnan. El a bisa cu esey tambe tabata trabao di Esser. Hues a mustra e solicitud di R. riba pantaya grandi cu ta dirigi na Otmar. Hues a puntra pakico. Otmar a bisa cu esey ta algo normal. Despues R. a manda carta pa Otmar pa gradici cu el a haya trabao y cu Otmar por conta riba su voto. Hues a puntra si asina Otmar tabata gana voto. Otmar a desmenti esey. El a bisa Hues cu e ta yuda masha hopi hende pero esey no kiermen cu nan tin cu voto p’e. El a bisa cu asina ta e cultura na Aruba, caminda ta yuda hende.
NENGA CU VITO CROES A CUMPR’E
Hues a menciona Vito Croes lo a cumpra Esser door di dun’e cos. Esser a bisa cu e tin hopi bon relacion y amistad cu famia y ruman di Vito Croes. El a enfatisa cu e no a haci nada y no a haya nada for di Vito Croes. Segun Esser el a mustra Vito Croes kico e mester haci pa un tereno cu desde 2015 ta para. Hues a mustra cu Vito Croes a paga estudio pa school di un yiu di Esser. Esser a bisa cu el a divorcia y door di su situacion, Vito Croes a yud’e.
Hues a menciona e dama N.R. y Esser a bisa cu desde 2013 N.R. a traha cu Otmar. Hues a menciona otro nomber y Esser a bisa cu e hendenan ta bay serca dje pa e yuda traha carta di solicitud pa Serlimar pero nunca el a duna hende trabao.
PAKICO A SACA MARISOL FOR DI PARTIDO
Hues a mustra cu tin whatsapp entre Marisol Lopez Tromp y Otmar. Esaki ta di 14 Maart 2020. Hues a lesa e mensahe di Marisol pa Otmar: “Bo ta na altura cu nos hendenan na Serlimar ta wordo kita y esnan di AVP no. Tambe Marisol ta bisa cu ta net nos hendenan. Segun Otmar, door di Marisol su actitud, di kier laga un compania priva tuma over Serlimar y esey no ta cuadra cu maneho di partido, a bin problema den partido y a saca Marisol for di partido. Segun Otmar, loke Marisol kiermen cu “nos hendenan ta wordo kita”, no kiermen esnan di partido POR sino hendenan cu ta trahando na Serlimar.
NENGA DI A NOMBRA DIRECTORA NA SERLIMAR
Hues tambe a mustra un procesverbaal di Landsrecherche riba e dama D.cu a wordo nombra como director na Serlimar door di Otmar. Otmar a desmenti esey. El a bisa Hues cu e dama D. tabata forma parti di e team di maneho y a wordo kita for di Serlimar door di e team maneho pasobra el a horta placa.
