Diahuebs mainta por a observa cu trahadornan di e compania Fast Nv a wordo cita na landsrecherche. Ariba e foto por mira auto di e compania staciona dilanti e edificio na Vondelaan.
Diaranson tabata mescos, varios trahador a wordo cita y mester a acudi pa contesta preguntanan.
Tabata mas bien un “kennis making” di recherchenan cu trahadornan.
Diamars atardi, di sorpresa husticia a invadi e negoshi y tambe cas di e doño.
E acusacion ta “labamento di placa”.
Loke ta remarcabel ta e hecho cu e investigacion aki ta wordo haci pa landsrecherche.
Landsrecherche ta cay aden solamente ora ta trata di asuntonan cu tin di haber cu gobierno of su trahadornan. A menos cu por tin cierto risico envolvi, y kier sake di man di polis, pa mande bao landsrecherche.
Container di hariña blanco cu cocaina;
Algun siman pasa, autoridad a intercepta un container carga cu 100 saco di hariña blanco, cu cual container tabata wordo yena na Fast, pa bay Hulanda. Ora a test e hariña blanco pa traha pan, a descurbi na un forma hopi sofestica cu e ta contene cocaina. Esnan responsabel pa e container a wordo deteni.
No por descarta cu e hayazgo aki ta loke actualmente husticia kier haya absoluto claridad y mira ken ta tras di e traficacion aki.
Histicia a bishita e comerciante den pasado:
Den pasado ya caba husticia a bishita e comerciante aki na varios ocacion, kisas como testigo den otro casonan, manera caso Avestruz y caso Flamingo. E inval di caso Flamingo a tuma lugar dia 24 di Juni 2020, unda tambe husticia a bishita su cas, su negoshi na airport priva y su oficina principal na Rumbastraat.
Testigonan a bisa cu e inval e biaha aki tabata uno total. Nan a yega diamars atardi y a keda ristra e oficina diamars anochi te den oranan laat y a sigui diaranson mainta.
Diabierna mester presenta dilanti huez comisario:
Diabierna e comerciante mester presenta dilanti huez comisario pa verifica su detencion, si ta wordo prolonga of no.
