Minister Glenbert Croes a informa dialuna mainta cu tin un investigacion forensico tumando lugar den e compania di awa, WEB NV, y esaki ta relaciona cu basta situacionnan cu a of ta tumando lugar.
E mandatario a bisa cu den un proyecto di instala motornan Watzilla, tin gastonan excesivamente halto a tuma lugar. Tin un suma di 70 miyon di ‘meerwerk’ cu a presenta. E mandario a habri su wowo pa enfatisa cu e 70 miyon no ta costo di e proyecto, sino e 70 miyon ta solamente trabaonan adicional cu den mundo di contruccion ta conoci como ‘meerwerk’.
Minister Croes a bisa cu e ta kere cu e proyecto di Secrets Hotel na Colony, kisas ta costa 70 miyon florin. SOLO DI PUEBLO ta compronde cu e minister ta referi na e hecho cu e construccion di un hotel completo ta costa 70 miyon florin. Un investigacion forensico den WEB ta necesario. Segun Croes e ta purba analisa e expresionnan di Sr. Richard Frank. No ta compronde e postura di VWI. Sr. Frank a chercha di e hecho cu a bay cumpra heavy fuel oil barata. Kisas ta debi na e hecho cu tin hendenan cu trahando na WEB cu tin salarionan asina halto, cu nan no ta sinti e dolor ora cu prijs di awa cu coriente aumenta.
