Durante e tempo cu Ir. Richard Eman a permanece na timon di Utilities Aruba Nv, el’a organisa e compania, structura esaki pa asina por fiha prioridad como tambe un vision pa wordo ecamina.

Tabata na comienzo di aña 2019, cu Minister President a puntra Utilites Aruba y Sr. Eman pa desaroya un Vison di Energía pa Aruba.
Utilities a hasi esaki tambe. E Vision aki a wordo finalisa día 9 di Juni 2019 cu e
puntonan principal:

  1. Cu Aruba lo cumpli cu e palabracionan hasi na e Acuerdo di Paris 2015
    cu na aña 2050 lo ta na un Net Zero carbon (CO2) emisión.
  2. Cu e tres parámetros cu ta Reliable-Affordable- y Sustainable lo wordo
    tuma na consideración den e proyecto aki.

Den e Energy Summit III, teni dia 18 di Decemeber 2020 a wordo tambe
determina cu lo no tin subida di tarifanan, lo cumpli cu e palabracionan di e
acuerdo di Paris 2015 y lo mantene minimal e confiabilidad di suministro di
energía.

Gobierno tambe lo kier enfatisa e programa di SDG di United Nations na unda e
persona ta central den esaki.

Después cu Summit di Energía III a conclui tur e puntonan arriba menciona
Utilities a cuminsa cu un estudio pre-feasibility pa introduci energía renovable y
sigui pa traha e raport pa con pa yega nan un Decarbonisation Pathway.
E puntonan principal di e Decarbonisation Pathway ta bai over na introducción
na gran escala di Molinanan di Biento y panelnan solar.
E meta ta pa den 7 aña yega na 84% di Energía Renovable. Después di esaki
dentro di 3 aña mas introduci Hydrogeno (H2) pa por acerca 100% energía
renovable.

Calculacion ta mustra cu na un 100% energía renovable lo tin:

  1. Un reducción di exportación di Forex di netto usd. 38 miyon pa aña.
    Esaki después cu e gastonan wordo kita pa e introducción di e molinanan.
    E total fuel savings lo ta usd 61 miyon pa aña.
  2. Tarifanan di corriente lo wordo reduci di Afl 0.36 /kwh pa Afl 0.20/kwh.
  3. Reducción di emisión di CO2 lo ta 72% na un introducción di 84% di
    energía renovable. (nos lo tin pues solamente 28% di CO2 emisión).

Lo ta importante den e periodo cu nos ta aumentando nos cantidad di energía
renovable, molina y panel solar, pa nos haya un mihor fuel pa run nos machinan
térmico.
E fuel cu ta wordo usa awor ta Heavy Fuel Oil cu ta uno hopi sushi. Ta emití
hopi CO2 y azufre y e ta un fuel cu ta “slow”. E motornan ta rev up mas slow y
e ta hopi menos eficiente riba diferente parti di operación di e motornan.

Un fuel mas light y limpi lo ta necesario como un combustible transitorio.
Gas natural (metano) ta parce di ta un bon fuel pa hasi esaki. Pero ta bon posible
cu nos por haya otro fuel manera Green Metanol cu ta fasil pa almacena y tin un
valor calórico halto.

Cambio pa un fuel transitorio ta concerni WEB.

RELATED ARTICLESMORE FROM AUTHOR