E candela a tuma luga na Al Haitham hall, na e comunidad di Qaraqosh, na e zona di Ninive, unda tabata celebra e banquete di matrimonio di un pareha di sirio catolico e anochi di diamars 26 di september. Aunke ainda no a confirma oficialmente e causa di e candela, e reportahe preliminar ta indica cu e dak a kima despues cu a tira vuurwerk for di paden.
E cristianonan iraquiano ta den luto despues di e candela di un boda cu a causa mas di 100 morto y 150 herida.
E obispo di Erbil, Bashar Warda, a emiti un comunicado den cual el’a afirma: “e palabranan no por describi adecuadamente e dolor di esnan cu ta hiba nan sernan keri na nan ultimo lugar di sosiego den nan antiguo tera. Loke lo tabata un momento di alegria a bira awor un comunidad completo di luto y conmocion profundo”.
Obispo Warda a bisa: “Patriarkanan, obisponan y saserdote di tur confecion a reuní awe na Qaraqosh pa dera e mortonan”.
Segun obispo Warda, e tragedia aki a uni e pueblo iraquiano ariba e fronteranan. El a bisa: “e sunitanan a cancela nan celebracion di e nacemento di nan profeta Muhammad, y tambe nos tin declaracionnan di condolencia y apoyo di e comunidad shia. E Gobiernonan di Irak i Kurdistan tambe a anuncia tres dia di luto”.
Segun autoridadnan di proteccion civil, salon Al Haitham a wordo construi cu panelnan prefabricado cu tabata “altamente inflamabel y tabata contra e reglanan di siguridad”.
Aunke ainda no a confirma oficialmente e causa di e candela, e reportahe preliminar ta indica cu e dak a kima despues cu a tira klaapchi tipo vuurwerk parti paden.
Autoridadnan a declara: “e candela a causa e caida di algun parti di e dak”. E candela a plama lihe, atrapando hopi di e 1.000 invitadonan.
Vice gobernador di Ninive, Hassan Al Allaq, a declara na Reuters cu te awor a confirma morto di 113 persona.
Sinembargo, ainda tin hende den paradero desconoci, ya cu ta dificil pa identifica e curpa pa motibo di e gravedad di e quemaduranan.
Cantidad di persona ta sigui ricibi tratamento na hospital pa quemaduranan serio y inhalacion di huma toxico.
E cristianonan di e playa iraquiano di Nineve a sufri dificultadnan social y economico despues di e invasion di e region Pa Daesh (ISIS) na augustus 2014.
AIN a sostene projecto di reconstruccion na Qaraqosh, yudando e cristiannan cu a regresa aya despues di e derrota di e jihadistanan.
Obispo Warda a conclui: “Mi ta pidi boso oracionnan pa e almanan ku nos a perde y pa e heridonan grave. Mi ta pidi boso pa resa pa e comunidad siriaco y nan famia na Irak y den e diaspora”.
