Pa un hende cu gusta papia di “futuro” y “responsabilidad,” Ivo Valdes sigur tin un memoria cortico y un cara largo. Den su recien opinion “serio” riba RAFT, e ta trata pa pinta su mes como un angel guardian, un heroe sin mancha. Pero nos no ta hende cu ta come storia barata. Nos ta hende cu ta wak historia y lesa realidad.
Ivo, papia berdad: RAFT ta morto. Evelyn Wever-Croes a pone esey un banda desde lunanan pasa. E ley no ta ni vigente, no tin forsa legal, y no tin ni futuro. Pero Valdes ta sigui papia comosifuera RAFT ta un “bon cos” cu ta okay pa e wordo accepta. Pakico? Pa defende su amigonan politico, e mes politiconan cu a haci desaster cu nos pais den tur sentido.
Ivo, ora bo ta lanta bo vos contra desaroyo irresponsabel, bo ta mustra un hipocrita. Mike Eman, e mesun persona cu bo a lembe durante añanan, ta esun cu a crea e mega debe di Aruba. Gabinete Mike Eman 1 y 2 a baha Aruba den un buraco financiero sin precedente. Y abo? Bo a core tras di dje, bo a firma hunto cune, bo a defende. Awo bo kier actua manera santo? Bo palabra no tin peso mas.
Desde e Welga di Hamber di Eman na 2014, Aruba ta den un cuadro di control cu CFT y LAFT. Tin un mecanismo cla: si gobierno no sigui e conseho di CFT, e caso por bay Rijksministerraad. Control ta presente, pero sin un ley colonian riba mesa. Sin un ley colonial cu abo ta sali defende awor! Pues aworaki Aruba ta controla, pero cu respet pa nos autonomia. E discurso di miedo cu bo ta traha, ta simplemente propaganda barata.
Bo kier papia di pueblo, pero bo a lubida loke bo mes a firma contra e pueblo na 4 ocacion? Laga nos recorda bo:
- Pensioen na 65 aña: Bo a firma p’e.
- Incorporacion di dos pensioen: Bo a firma p’e.
- Middenloon regeling: Bo a firma p’e.
- Kita e compensacion di gelijkbedrag: Bo a firma p’e.
Tur e firmanan aki ta hacibo un persona inconfiabel. Ningun hende ta kerebo! Bo no ta un defensor di pueblo. Bo ta un traidor! Bo ta e mesun dokter cu a pasa e inyeccion mortal di eutanasia na e pensioen di trahador. Y awo bo kier mustra bo mes como e angel guardian ? No Ivo, bo ta e bordugo bisti na bata blanco.
Pueblo Arubano ta lanta. Nos por pensa pa nos mes. Nos no ta wak bo como un lider, nos ta wak bo como un lembelansa. E RAFT ta morto, pero bo hipocresia ta mas bibo cu nunca.
Aruba no mester Valdes, Aruba mester husticia, memoria pa recorda, y lider cu ta defende pueblo, no traicionanan.
