Isman ta keda independiente of mester pasa pa Hospital ?

ORANJESTAD – Rednan social a explota e siman aki despues di un intercambio di palabra masha cayente mes entre e big shot di HOH, Jacco Vroegop y e conocido Dr. Ike Posner. Locual a cuminsa como un expresion di opinion riba LinkedIn di Jacco riba e futuro di nos cuido di salud yama “ E olifanti roos” a haya un contesta fuerte di Dr Ike Posner, cu opinion di Jacco mas bien ta di “buriconan cu ta cana rond”.

Kico ta e essencia?

E discusion ta draai rond di un solo pregunta: Aruba mester di un solo hospital grandi, of nos mester keda cu HOH y IMSan separa? Jacco Vroegop ta boga pa un “fusion”, locual kiermen uni e dos institutonan aki pa nan bira un solo organisacion.

Di otro banda, Dr. Ike Posner ta para firme cu esaki ta un peliger pa e pueblo y cu mester respeta locual Parlamento ya dicidi caba.

Jacco y su “Olifanti Roos”

Sr. Vroegop a lansa un documento caminda e ta bisa cu ta ora pa saca e “olifanti roos for di kashi”. Segun e, nos ta gaña nos mes pensando cu nos tin dos hospital completo. El a splica cu:

Tin demasiado fragmentacion (cuido parti na pida-pida).

Esaki ta costa hopi placa y ta causa ineficiencia.

E kier un solo mando pa “mihor control” y “mihor cuido”.

Posner a contesta: “No tin Olifanti, nos tin Burico ta cana rond!” (Indirectamente e kemen Jacco)

Dr. Ike Posner no a warda pa duna Jacco un bofta verbal. El’a desmantela e idea di Vroegop masha lihe, bisando cu e modelo aki a faya caba na Hulanda. Posner su puntonan tabata fuerte:

Democracia: Parlamento a bisa caba “NO” na un fusion. Vroegop no por ignora esaki.

Monopolio: Si tin un solo hospital y algo bay malo, henter e sistema ta cay den otro. Competencia y cooperacion ta mihor cu un solo doño.

Humildad: Posner ta haya cu un hospital sin competencia ta perde su humildad pa cu e pashent.

Palabra nan duro

E debate a bira personal y colorido cu e metaforanan uza:

Jacco Vroegop: Ta uza e frase “Olifanti roos” pa bisa cu tin un problema grandi cu ningun hende kier papia di dje: cu e sistema actual no ta funciona.

Ike Posner: A contesta cu masha sarcasmo: “Na Aruba nos no tin olifanti, pero si un par di burico ta cana rond”, refiriendo cu e idea di fusion ta uno bobo y fuera di realidad.

E cos ta cayente:

Pa e ciudadano comun, e discusion ta simpel:

Vroegop  kier uni tur cos pa spaar placa y centralisa tur cos. Defacto e kemen cu Jacco lo ta director di Hospital Horacio Oduber y Imsan.

Posner kier pa IMSAN y HOH traha hunto pero separa, pa asina e pacient tin opcion y pa respeta e decision di nos representantenan den Parlamento.

Segun Posner ya caba algun tempo pasa, parlamento a vota riba un mocion unanime pa no uni hospital cu imsan.

Ken tin rason? E debate aki apenas a cuminsa!