Parlamentario y lider di fraccion di AVP, Sra. Jennifer Arends-Reyes, a participa den un encuentro di gran importancia durante e bishita oficial di Sr. Tom de Graaf, Vicepresidente di Raad van State di Hulanda, kende a bishita Aruba hunto cu un delegacion oficial den marco di su bishita di despedida den Caribe Hulandes.
E bishita a forma parti di un programa institucional cu tin como meta pa fortifica y evalua e cooperacion existente entre Aruba y Raad van State, promoviendo un dialogo continuo riba tema di ley, gobernacion y e proceso legislativo dentro di Reino.
Durante e reunion, Arends-Reyes a pone enfasis riba e rol crucial cu Raad van State ta hunga como organo di asesoria huridico y supervision legislativo. Segun e lider di fraccion di AVP, e presencia di Sr De Graaf y su delegacion na Aruba ta confirma cu e relacion entre e paisnan di Reino mester keda basa riba respet mutuo, comunicacion habri y cooperacion efectivo.
“Nos ta aprecia e oportunidad pa intercambia punto di bista cu un institucion di tanto balor pa e desaroyo di ley y gobernacion. Aruba mester sigui inverti den dialogo cu instancianan cu ta contribui na stabilidad y transparencia di nos sistema democratico,”
Arends-Reyes a expresa.
E encuentro a inclui discusion riba diferente tema relevante pa Aruba, incluyendo e desafio cu paisnan chikito dentro di Reino ta enfrenta en materia di sostenibilidad, maneho financiero y cooperacion.
Arends-Reyes a subraya cu pa Aruba ta esencial cu e cooperacion dentro di Reino no ta limita na formalidad, sino cu e ta funciona como un instrumento practico pa logra solucionnan duradero y pa fortalece e base democratico di nos institucionnan.
Durante e bishita, Sr. Tom de Graaf a ricibi palabra di agradecimento den nomber di fraccion di AVP pa su dedicacion y liderazgo como Vicepresidente di Raad van State. Representantenan di gobierno y Parlamento a reconoce su compromiso y e rol cu el a hunga den fortalece e comunicacion entre Hulanda y e paisnan den Caribe Hulandes.
E delegacion tambe a mustra interes den e progreso cu Aruba ta haci riba modernisacion y mehoracion di e proceso legislativo, y a expresa apertura pa continua dialogo cu diferente actornan local, incluyendo Parlamento, gobierno y sector huridico.
Sra. Jennifer Arends-Reyes a conclui cu tipo di encuentro aki ta di gran balor pa Aruba, pasobra cu e ta promove mas comprension mutuo y ta crea espacio pa cooperacion real basa riba igualdad y respet.
“Aruba ta un pais cu tin su propio dignidad y responsabilidad dentro di Reino. Nos mester sigui mantene comunicacion habri cu institucionnan manera Raad van State pa sigura cu nos sistema legal y democratico ta sigui fortalece,” Arends-Reyes a conclui.
E bishita di despedida di Sr Tom de Graaf ta marca un momento simbolico di transicion, pero na mesun tempo ta sirbi como recordatorio cu cooperacion institucional entre Aruba y Reino mester keda un prioridad.
