Parlamentario Jennifer Arends-Reyes, como lider di fraccion AVP, a tuma parti na e celebracion nacional na nos isla ruman Corsou pa conmemora e Dia di Abolicion di Sclavitud dia 1 di juli y e Dia di Bandera dia 2 di juli. Riba invitacion di e autoridadnan di Corsou, Arends-Reyes a representa nos pueblo Arubano den un spirito di union, respet historico y patriotismo Caribeño.
Durante e acto di Bahamento di Bandera dia 1 di juli na Plasa Brion, e programacion a inclui presentacion di grupo cultural, discurso di lidernan local, entrada solemne di gruponan hubenil uniforma y un interpretacion emotivo di e himno di Corsou pa Izaïher Smith. E momento cu bandera a baha simbolisa un momento di refleho profundo riba e victimanan di sclavitud y e resistencia di un pueblo cu nunca a perde su dignidad.
E Caminata Artistico riba Brug, un paso simbolico cu e pueblo a tuma hunto pa Fort Amsterdam, caminda e Dia di Emancipacion tabata conmemora cu tambu, cuenta y cuminda. Den su palabra, Arends-Reyes a enfatisa: “Bo por kita un hende for di su tera, pero nunca su alma for di su pueblo. E historia di resistencia y emancipacion ta uni nos islanan, ta uni nos pueblo.”
E dia siguiente, 2 di juli, Dia di Bandera, a cuminsa trempan na Parlamento cu un reunion solemne sigui despues pa Plasa Brion. Representantenan di gobierno y parlamento di Corsou y islanan den Reino a yega, sigui pa entrada di gruponan uniforma, un discurso spiritual y un acto solemne di hisa bandera cu permiso di e Gobernador, su excelencia Lucille George-Wout.
Na fin di e evento, Arends-Reyes a comparti su admiracion pa e manera cu pueblo Corsou ta honra su pasado y su bandera: “Un bandera ta mas cu un simbolo; ta un testigo di lucha, di progreso y di identidad. Mi kier expresa mi felicitacion profundo na nos rumannan di Corsou pa un celebracion digno y inspirativo. Aruba ta orguyoso pa ta su pueblo ruman.”
Arends-Reyes a sigui menciona cu nos pueblo Caribeño mester sigui traha hunto pa reconoce y sana e herida historico di sclavitud, pero tambe pa avansa hunto na un futuro cu ta basa riba dignidad humano, colaboracion regional y orguyo cultural.
