Parlamentario Jennifer Arends-Reyes a wordo re-elegi como Presidente di Comision di Turismo y di Comision di Asuntonan di Reino y Relacionan Exterior di Parlamento di Aruba. E re-eleccion ta duna continuidad na un aña di trabou activo, durante cual Arends-Reyes a presidi 11 reunion di comision riba diferente asunto di importancia nacional y internacional.
Durante e aña parlamentario anterior, Arends-Reyes a conduci reunionnan unda dialogo, intercambio di informacion y control parlamentario tabata central. Tanto den area di turismo como den relacionan di Reino y exterior, e comisionnan a trata topiconan cu tin impacto directo riba posicion economico, social y internacional di Aruba.
Den Comision di Turismo, e atencion a keda dirigi riba futuro di e sector principal di economia di Aruba. Temanan manera calidad di producto turistico, sostenibilidad, inversion, infrastructura, desaroyo di diferente proyecto y e balans entre crecemento economico y calidad di bida di pueblo a forma parti di e agenda.
Arends-Reyes ta considera cu Parlamento mester keda activamente involucra den e conversacion tocante rumbo di turismo. “Turismo ta sigui ta esencial pa nos economia, pero cada paso den desaroyo mester wordo mira den un contexto mas amplio. Nos mester wak economia, calidad di bida, sostenibilidad y oportunidad pa nos propio pueblo como parti di un vision,” Arends-Reyes a expresa.
Como Presidente di Comision di Asuntonan di Reino y Relacionan Exterior, Arends-Reyes tambe a sigui pone enfasis riba participacion activo di Aruba den asuntonan cu ta toca posicion di pais den Reino Hulandes.
Durante e periodo anterior, e comision a dedica atencion na cooperacion entre e paisnan di Reino, relacion cu Hulanda, supervision y asuntonan financiero, mientras cu e encuentronan di IPKO y Tripartite a ofrece oportunidad pa Aruba presenta su posicion, preocupacion y prioridadnan den dialogo cu otro parlamentonan di Reino.
Segun Arends-Reyes, Aruba mester sigui ocupa su luga na mesa basa riba respet mutuo. “Relacionan di Reino no mester ta algo cu nos ta sigui di distancia. Aruba mester participa, haci pregunta, presenta su punto di bista y defende su interes. Dialogo ta importante, pero dialogo mester tuma luga riba base di igualdad y respet” el a indica.
E re-eleccion como presidente di ambos comision ta nifica cu Arends-Reyes lo por sigui duna continuidad na diferente dossier y contacto cu a wordo construi durante e ultimo añanan parlamentario. E ta gradici e miembronan di ambos comision pa nan aporte y cooperacion, enfatizando cu un comision parlamentario ta fuerte ora tin espacio pa diferente opinion y pregunta.
“Mi ta aprecia e confianza pa sigui carga cu e responsabilidad aki. Mi meta ta pa nos comisionnan keda activo, productivo y enfoca riba contenido. Parlamento mester ta un luga unda nos no solamente constata problema, pero unda nos profundisa, controla y contribui cu idea y solucion pa Aruba.”
Cu inicio di e aña parlamentario nobo, Arends-Reyes ta indica cu lo sigui traha pa fortalece e rol di e dos comisionnan y pa tene Aruba su interes central tanto den desaroyo di turismo como den e relacionnan di Reino, regional y internacional.
