Parlamentario Jennifer Arends-Reyes, lider di Fraccion di AVP y Presidente di Comision di Turismo di Parlamento, ta felicita La Cabana Beach Resort & Casino cu e celebracion di su 35 aniversario.
Trinta y cinco aña ta un logro special cu ta representa añanan di trabou, perseverancia y compromiso cu e bishitantenan cu ta scoge Aruba como nan destino di vakantie. Durante su trayectoria, La Cabana a bira un parti conoci y aprecia di nos producto turistico, mientras cu e resort tambe ta disfruta di gran popularidad entre nos comunidad local.
Tras di e experiencia cu La Cabana ta ofrece tin, prome cu tur cos, su hendenan: trahadornan cu ta ricibi e huespednan cu un sonrisa, cu ta presta atencion na cada detaye y cu tur dia ta duna lo miho di nan mes.
“E exito di un resort no ta depende solamente di su facilidadnan, sino specialmente di e hendenan cu ta haci cada huesped sinti bon bini. E dedicacion, hospitalidad y compromiso di e trahadornan di La Cabana merece un reconocemento special durante e aniversario aki,” Arends-Reyes a expresa.
E parlamentario a destaca tambe e inversion cu La Cabana a haci den renobacion di su pool deck. E renobacion ta contribui na un ambiente mas moderno y agradabel pa e huespednan, mientras cu e ta demostra e importancia di sigui cuida y mehora e facilidadnan turistico existente.
“Ora un resort ta inverti den su propiedad, e no ta mehora solamente e experiencia di su huespednan. E ta yuda mantene e calidad di nos producto turistico y fortalece competitividad di Aruba como destino,” Arends-Reyes a señala.
Segun Arends-Reyes, e celebracion di 35 aña ta un oportunidad pa wak atras cu gratitud riba tur loke a wordo logra, pero tambe pa mira dilanti cu confianza. Un sector turistico fuerte ta depende di calidad, inversion continuo y, specialmente, di e hendenan cu tur dia ta duna bida na nos industria.
“Nos ta spera cu La Cabana lo sigui crea oportunidad pa trahadornan local y continua na contribui positivamente na nos economia y comunidad. Cada inversion den calidad, desaroyo y capital humano ta un inversion den futuro di Aruba,” el a agrega.
Na nomber di Fraccion di AVP, Jennifer Arends-Reyes ta felicita gerencia di La Cabana, su General Manager, Sr. Joe Najjar, tur e trahadornan y cada persona cu durante e ultimo 35 añanan a contribui na e historia y exito di e resort.
“Nos ta desea La Cabana un celebracion bunita y hopi mas aña di progreso, hospitalidad y exito. Pabien cu 35 aña, La Cabana!”
