Un stempel den su paspoort, un biahe yen di soño y trinta aña di experiencia a transforma Aruba den un segundo hogar pa Jhon Freddy Tobón Montoya. Awe, 23 di october 2026, e ta conmemora tres decada desde cu el a yega for di Colombia, compartiendo un testimonio personal cu ta refleha su amor pa su tera natal y su agradecimento na e isla cu a habri su portanan p’e.
Pa Jhon Freddy Tobón Montoya, 23 di october no ta solamente un fecha riba calendario. Ta e dia cu a marca cuminsamento di un capitulo nobo den su bida, ora cu na 1996 el a pisa tera Arubiano cu speransa di construi un futuro miho.
Durante e trinta añanan aki, Aruba a bira mucho mas cu un luga pa biba. E isla a ofrece oportunidadnan pa crece, desaroya su talento, forma amistadnan y crea un conexion profundo cu su comunidad. Sin lubida su raiz Colombiano, el a siña aprecia Aruba como e tera cu a permiti su soñonan florece.
Cu ocasion di su aniversario di 30 aña na Aruba, Jhon Freddy a comparti un reflexion extenso y emotivo, den cual e ta expresa su gratitud na Dios, na pueblo Arubiano y na tur esnan cu a forma parti di su caminda.
A continuacion, su mensahe personal den su totalidad:
ARUBA, MASHA DANKI
30 AÑA BIBANDO DEN NOS PARAISO
23 di october 1996 – 23 di october 2026
Trinta aña di un stempel cu a marca mi bida, creando e ruta pa un historia nobo; un destino cu a marca mi bida y un amor cu semper mi lo comparti.
“Colombia a planta den mi e simia di mi existencia y Aruba a duna mi e tera pa mi crece y prospera.
Mi a yega cu mi raiz, pero aki, mi a florece y a duna fruta.”
Trinta aña pasa, mi a sali for di Colombia cu soñonan den mi maleta y cu speransa den mi curason.
Mi a cuminsa un biahe cu hopi incertidumbre, sin sa di tur e sacrificionan, batayanan y retonan cu mi mester a enfrenta y cu awe ta forma parti di mi historia.
Awe, mirando e stempel di mi paspoort, mi ta compronde cu e dia cu mi a lesa “Bonbini na Aruba”, mi no tabata compronde tal bendicion; solamente mi tawata sa cu mi tawata drentando un isla: sin realisa cu mi tawata cuminsando cu’n capitulo nobo di mi existencia, un historia cu a transforma mi bida y cu a laga un marca eterno den mi alma.
COLOMBIA TA MI SIMIA Y ARUBA TA MI COSECHA.
Colombia a planta den mi, e prome simia di bida, a nutri mi prome soñonan y den e tera di mi origen mi a haya mi raiz, mi esencia y mi identidad.
Pero tabata aki, na Aruba, na unda un tera nobo, fertil y generoso, a habri su brasanan pa mi, a duna mi awa pa bebe, solo pa trece rayonan di luz y speransa y espacio pa habita y a permiti mi crece den libertad.
Colombia a planta e simia di mi existencia y Aruba, cu su tera fertil, a laga mi produci.
Mi a yega cu mi raiz, pero aki mi a sigui crece; mi a yega cu mi soñonan, pero aki mi a siña cultiva nan; mi a yega cu mi talento, pero aki mi a haya caminda pa comparti y desaroya.
Y awe, despues di trinta aña, mi ta mira mi bida como un mata cu su raiz ta keda fiel na su origen, pero cu su ramanan a haya espacio pa habri, florece y duna fruta bao di e solo generoso cu a brasa mi y riba e tera bendiciona di mi Aruba cu a carga mi cu tanto amor.
Mi a bira e wantomba silencioso cu a logra haya su bos den un idioma nobo. Mi a bira e warawara cu a domina e haltura di bondad bulando den shelo descubriendo un horizonte nobo. Mi a bira e watapana cu mi silueta inclina sin niun preocupacion, pa no hiba e biento di duda su contrario, pa finalmente e no tin no di reclama. Mi a bira e mata cu a para firme riba tera nobo pa keda bendiciona, tumando e posicion di humildad di un forma natural pa nada malo no benta mi abao.
Mi a nutri di e suela hayando e bonansa y fortalesa pa domina cualkier bentabal, pa nada; ni miedo, ni tormenta, no laga mi cay.
Colombia ta mi raiz berdad, pero Aruba a bira e tera na unda mi por a florece. Colombia ta mi origen y Aruba ta parti di mi cosecha.
Y si awe tin fruta den e mata cu mi ta, mi sa cu mi no por atribui tur gloria na mi mes, pasobra un simia mester di tera, un mata mester di awa y un soño mester di un oportunidad pa bira realidad.
Danki Colombia pa duna mi loke mi tin. Danki Aruba pa permiti mi bira loke mi ta.
Mi raiz ta Colombia, mi cosecha ta carga e amor di dos tera y mi curason yen di gratitud ta bati cu emocion den e isla cu mi a siña yama hogar.
Trinta aña pasa, un stempel a marca mi entrada, un fecha, un isla, un destino pa descubri; un “Bonbini na Aruba” cu tawata spera mi na entrada, sin sa cu e palabranan ey lo cambia mi bida pa semper.
Mi a yega cu soñonan den mi maleta, cu speransa den mi mannan y cu fe den mi caminda cu pasonan gigantesco pa cana.
Mi no tabata sa cuanto biaha mi lo mester a lanta, ni cuanto biaha bida lo pidi sacrificio pa realisa e bendicion di ta parti di bo famia, pero mi a bini sin imagina tal grandesa y den e amor pa mi isla y mi paraiso; mi a keda.
Danki Aruba, pa duna mi un luga y brinda mi tanto oportunidad, pa laga mi planta mi pia riba bo tera y, poco poco, gana un luga den bo curason.
Danki pa e solo cu su calor cu ta yena mi cu energia, cu su color di oro cu a bira parti di mi cuero y pa cada manece cu ta recorda mi cu despues di cada nochi tin un dia nobo pa continua.
Danki pa e baranca cu ta sostene mi pianan, pa e fortalesa y sabiduria cu mi a siña di bo tera, pasobra no tur caminda tabata suave, no tur dia tabata flor, pero te hasta entre sumpiña y baranca skerpi, mi a siña cu lucha tambe por produci flor.
Danki pa e salo di bo lama cu ta purifica mi alma ora mi curason tawata cansa; pa e olanan cu ta laba mi preocupacionnan y pa e horizonte cu a siña mi sigui soña.
Danki pa e shelo inmenso, cla y profundo cu mi a carga den mi memoria como un tesoro; pa e biento fresco cu ta pasa riba mi cara y ta supla den mi mente cu ideanan nobo, bisando mi: “Sigui, no laga bo soñonan muri.”
Danki pa cada rincon di bo naturalesa, incluso den e curason di su habitantenan, pa cada recuerdo bunita cu boso a regala mi y tur cos cu hunto por a construi, pa cada sonrisa, cada man extendi, cada palabra di aliento y cada porta habri.
Pasobra mi no a yega te aki solamente cu mi propio forsa, mi a yega tambe riba e bondad di hende, riba e confiansa di esnan cu a kere den mi, riba e generosidad di esnan cu a duna mi un oportunidad y riba e amor di esnan cu a acepta mi tal manera mi ta, si lubida riba e regalo di destino y boluntad di Dios.
Trinta aña…Trinta aña di lucha y perseverancia, di sacrificio y speransa, di cay y lanta bek, di despedidanan y di encuentronan, pero tambe di logronan, amistadnan y bendicionnan tan aprecia.
Trinta aña den cual mi no a perde mi esencia, ni mi idioma, ni mi origen, ni e raiz di mi existencia.
Colombia ta biba den mi sanger, den e recuerdo di mi infancia, den e brasa di mi famia, den e bosnan cu e distancia no por pone den silencio.
Colombia ta mi raiz…pero Aruba ta mi curason.
Un raiz ta duna un mata su identidad; un tera nobo por duna e mata espacio pa crece y asina; entre dos mundo cu mi ta stima, mi a siña cu amor no ta parti den dos: amor ta multiplica ora nos ta siña aprecia y respeta.
Mi ta Colombiano den mi origen y awo, Arubiano di curason y un ser humano agradecido pa e privilegio di por yama e dos tera aki, parti di mi historia.
Danki Colombia pa mi educacion. Danki Aruba pa mi hogar. Danki Dios pa e caminda, pa e forsa y fe y pa e bendicion di por a yega te aki.
Si mi por a bolbe mira e homber cu a yega Aruba na aña 1996, lo mi bis’e cu no tur cos lo por ta facil, cu lo por tin dia cu e lo sinti soledad y duda, cu lo por tin portanan dal cera y camindanan cu lo pinta bao di mi pianan dificil pa cana; pero tambe lo mi bis’e: “Sigui marca paso, laga lastro, no perde fe den bo mes. Un dia bo lo mira atras y lo compronde cuanto bo a crece y cuanto bo ta bendiciona.”
Y awe, trinta aña despues, mi ta para cu humildad y orguyo, no pasobra tur bataya a caba, sino pasobra mi no a laga nada kibra mi soño di construi y brasa loke Dios a pone den mi mannan cu tanto responsabilidad.
Mi ta aki, cu mi cicatriznan, mi experiencianan, mi arte, mi pasion y mi fe.
Mi ta aki, cu mi curason yen di gratitud, ainda convenci cu mi lo sigui coregi, kere, crea, sirbi y duna mas di mi mes sin mester di limita.
Pasobra Aruba no solamente a habri su porta pa mi: Aruba a bira e escenario na unda mi por a sigui descubri mi mes, na unda mi por a comparti mi talento, na unda mi por a planta un simia y duna cu mi propio awa tur contribucion den e luga na unda mi por a siña y realisa cu un hende por bira parti di un famia no solamente pa e luga na unda a nace, sino tambe na unda a siña stima, respeta y pertenece.
Y si un dia mi bolbe mira e stempel di entrada, mi lo no mira solamente un fecha den un paspoort cu wowonan di duda, mi lo mira un promesa, un destino, un regalo, un acto di fe, y e prome pagina di trinta aña di un historia cu ainda tin hopi pa crea, conta y sigui skirbi y construi.
Pasobra e stempel di entrada ta keda den papel, pero e stempel di amor cu Aruba a laga den mi alma no tin fecha di vencemento, no tin dia di salida, ni frontera cu por kita di realisa cu mi tambe ta su yiu.
Aruba ta mi tera di oportunidadnan, mi isla di encanto, mi refugio y mi escenario di bida.
Masha danki pa bo solo y su calor. Danki pa e lama y su profundidad. Danki pa bo baranca y su fortalesa. Danki pa e biento y su aire di paz. Danki pa e hendenan y e curasonnan cu a sa di aprecia. Danki pa e oportunidadnan di lucha, di crece y di pertenece. Y ora mi bisa “Aruba ta mi cas y cu ami tambe ta su yiu”, no ta solamente un frase cu mi ta pronuncia: ta trinta aña di bida cu ta papia di mi historia cu ta duna testimonio cu’n alma cu ta expresa su gratitud. Colombia ta mi raiz. Aruba ta mi curason y Dios ta mi guia.
Esaki ta mi manera di honra e caminda.
23 di october 1996- 23 di october 2026.
Trinta aña despues di e prome “Bonbini”, mi ta contesta cu tur mi alma, cu tur mi ser y cu e mas profundo sinceridad:
ARUBA, MASHA DANKI. MI LO KEDA ETERNAMENTE AGRADECIDO!
“Si Colombia ta mi raiz, Aruba ta mi curason.”
Cu hopi amor, humildad y gratitud,
Jhon Freddy Tobón Montoya
Un Colombiano di raiz, un Arubiano di curason.
Un historia di gratitud cu ta conecta dos tera
E testimonio di Jhon Freddy Tobón Montoya ta mustra con un persona por conserva su identidad y amor pa su tera natal, mientras cu e ta desaroya un sentido profundo di pertenencia na un otro pais.
Su palabranan ta refleha no solamente trinta aña di residencia na Aruba, sino tambe e sacrificionan, oportunidadnan, amistadnan y experiencianan cu a forma e persona cu e ta awe.
Den su reflexion, Colombia ta representa su raiz, mientras cu Aruba ta simbolisa e tera cu a permiti su bida florece. E comparacion aki ta forma e esencia di su mensahe, caminda amor pa dos tera no ta un contradiccion, sino un expresion di gratitud.
Cu su testimonio, Jhon Freddy ta honra e pueblo Arubiano cu a ricibie y e comunidad cu el a siña considera su famia. Su historia ta recorda nos cu un hogar no ta determina solamente door di e luga na unda un persona a nace, sino tambe door di e tera na unda el a haya amor, oportunidad y un sentido di pertenencia.
Awe, 23 di october 2026, e stempel di su paspoort ta representa trinta aña di recuerdo, perseverancia y bendicion. Un historia cu a cuminsa cu un simpel “Bonbini na Aruba” y cu awe ta encontra su expresion mas sincero den dos palabra:
MASHA DANKI, ARUBA!
