Joran van der Sloot a admiti su culpabilidad den corte Mericano pa extorsiona Beth Holloway
BIRMINGHAM-Joran van der Sloot a declara su mes culpabel den un corte Mericano den un caso di extorsion cu ta envolvi Natalee Holloway, segun medionan mericano a informa. El’a yega na un acuerdo cu husticia Mericano pa admiti fraude y extorsion y comparti informacion riba e morto di e hoben mericano desapareci, a cambio di un reduccion di castigo.
A cambio di su confesion y un declaracion di culpabilidad pa extorsion di famia di Natalee Holloway, Van der Sloot lo ricibi un sentencia reduci di 20 aña, si e fiscal di Alabama dicidi.
Confesion:
Segun Van der Sloot, e asesinato a tuma luga despues di un anochi di fiesta cu hopi alcohol y droga, durante cual el a conduci te na su hotel cu dos amigo y Natalee. Na lama di Aruba, e ta bisa cu a tuma lugar un confrontasion cu Natalee, kende a dal’e cu un rudia despues cu e tabata kier tin relacion sexual cune. Den un erupshon di violensia, Van der Sloot supuestamente a dal’e den cara, loke a hasi cu Natalee a cay na tera. E ta bisa cu despues el a coy un baranca grandi y tir’e riba cabes di Natalee. Den panico, supuestamente el a tira e curpa den lama. Van der Sloot ta bisa cu e no ta compronde dicon nunca nan no a haña curpa di Natalee.
Joran kier cambia su rumbo despues di a confesa e asesinato di Natalee :’ Ora nan liberami na 57 aña, mi ta bai yuda otro hende’
FBI Mericano a investiga e confesion den ultimo lunanan y ta considera e “confesion” di Joran creibel. Segun FBI, un prueba di detector di mentira cu Van der Sloot a pasa siman pasa ta un indicacion importante cu e hulandes ta bisa e berdad e biaha aki.
Si e hues aproba e acuerdo ayera, Van der Sloot lo wordo transporta pa avion bek pa Peru poco mas promer, unda ainda lo mester bay den prison te 2045 pa motibo di asesinato di e peruano Stephany Flores.
