Joran van der Sloot a presenta dilanti hues na e estado Mericano di Alabama. Durante e prome tratamento di su caso, e la bisa cu nunca e la comete e crimennan cu e ta wordo acusa di nan. Esaki segun medionnan Mericano. Segun CNN, e prome presentacion di Joran den Corte no a dura ni cinco minuut.
Van der Sloot ta na Merca pa motibo cu e ta wordo sospecha di a presiona e mama di Natalee Holloway. E la priminti Beth Holloway si e pag’e, e lo bis’e unda e cuerpa di Natalee ta.
Joran ta e sospechoso principal den e caso di desaparecion di Natalee Holloway na Aruba, na mei 2005, pasobra e tabata e ultimo persona cu a wordo mira hunto cu Natalee.
E hues a pidi Van der Sloot pa duna un reacion formal riba e acusacionnan entre otro cu e lo a presiona e mama pa placa, Tambe Hues a pasa riba un serie di otro tramitennan hudicial, cu tabata encera tambe pa asigna un abogado pa Joran. CNN a bisa cu nan lo a trece un traductor, pero Van der Sloot a bisa den corte cu e no tin mester di dje. Segun Van der Sloot su Ingles ta perfecto y no ta necesario.
Peru a extradita Van der Sloot temporalmente pa Merca pa e caso aki. Na Peru e tin cu sinta e resto di su castigo di 28 aña di prison pa e asesinato di Stephany Flores.
