E lider sindical di Simar, Josefina, no ta cansa di lansa instigacion contra di Gobierno.
Recientemente el’a bay compara e cantidad di trahadornan di Minister Presidentnan den Reino, entre Curacao, Hulanda, Sint maarten y Aruba, pa djey e saca su gal riba 21 trahador di oficina di Promer Minister di Aruba, Sra. Wever Croes.
Kico el’a faya?
Josefina a faya di hasi un comparacion profundo y completo. El’a tuma cualke fuente di informacion cu el’a haya riba internet, y klakkeloos a hasi comparacion.
Promer Minister di Aruba actual tin 21 empleado, pero tempo di Mike, e tabatin 147 empleado.
Pues awor tin 126 empleado menos.
E 21 empleadonan ta entre otro secretaria, administracion, telefonista, chofer, bode, werkster, como tambe varios consehero pa atende e carteranan cu ta cay bao di promer minister.
Awor supongamos cu Prome Minister manda su empleadonan cas, casi 17 lo keda den gobierno toch, ya cu nan ta presta for di departamentonan. Kisas 4 of 5 a bini cune y lo bay cune.
Awor, kico te peso di e empleadonan aki den presupuesto? Si kita 5 empleado, e placa ey lo yega pa paga 5000 empleado publico 12.6%?
Pues ta realmente un perdemento di tempo, cu comparacionnan a la kip zonder kop, cu no ta logra net nada.
Nos a mira Josefina su potret sinta den banki na cas di partido. Eynan e mester a reclama dicon 147 cordinador den oficina di su amigo Mike durante nan gobernacion.
Sinembargo no por spera nada otro di Josefina cu awor el’a subi tereno politico, sali for di su trabao di lider sindical, y cuminza lanta tur mainta pensa con pa lansa atake politico.
Nos a lesa cu na Epb, tin scarsedad di maestro, kisas ta na su lugar pa manda Josefina bay traha!
