Hasta Jose Feliciano ta mira cu Gobierno tin problema serio cu DIP
8 e-mail manda pa Sr. Haime Croes, sin ningun contesta
E departamento di DIP cu ta maneha tereno y edificionan di gobierno ta draai di malo en peor. Dialuna mainta e comerciante Sr. Kanaan Baroud tabata na Top 95 fm unda el’a trece su desapunto pa e trato cu e ta ricibi for di DIP.
Tabata aña pasa cu el’a haya e opcion pa por tuma over y renoba Juliana School y Beatrix School y asina haci nan Universidad pa studia medicina na Aruba.
Lunanan a bay pasando y DIP nunca a informa Sr. Baroud, kico e huur lo costa y sin e informacion ey, e no por sigui haci tur su estudionan financiero.
A manda Director Haime Croes mas di 8 e-mail, y ningun el’a contesta, pero si tabata por a manda un carta pa cancela e opcion na Maart 2022.
Esey no ta husto, pasobra no ta forma pa get rid di e compromiso y e projecto, cu ya caba tin un aprobacion di Conseho di Minister.
Si e scol di mediciona no cuminza traha su campus, e lo bay confonta problema cu “acreditacion internacional”, cual defacto ta baha nan den tal categoria cu nan scol no tin valor ni reconocimento.
Esaki no ta prome ves cu ta sali comerciantenan of cuidadanonan cu ta bisa cu DIP su servicio ta na werki. Tur hende sa cu tin investigacion, pero tampoco por ta motibo pa tranca tur desicion den un pais.
Sr. Baroud a bisa, cu si no bini cu un contesta pe, of un solucion, ta oblige di busca su derecho den corte unda e ta sigur cu e tin e caso aki gana, pasobra ta DIP a incumpli di duna informacion pa despues tira culpa riba Baroud.
Pues e futuro di e edficionannan awor ta insigur y no sa ta kico lo bay pasa. Sr. Kanaan Baroud a bisa di hasta lo por cuminza un caso di daño contra Gobierno y DIP, pa e forma pesimo cu el’a wordo mal trata. Finalmente e ta descarta tur problema legal y ta pidi pa sinta na mesa y yega na un solucion.
