Kapel Emanuel: un simbolo di fe y historia cu awor ta monumento protehi

Diaranson atardi pa 6 or, Prome Minister mr. Mike Eman lo pone oficialmente e seyo di monumento protehi riba Kapel Emanuel na Grote Bergweg na San Nicolas. Cu esaki, e kapel lo bira oficialmente parti di e patrimonio historico protehi di Aruba. Kapel Emanuel a wordo traha durante e periodo cu Pader Bernardinus van Baars tabata pastoor di San Nicolas. E arkitecto Virgilio Kock a diseña e edificio den forma di letra “V” inverti, cu tur muraya, plafond y e bankinan dirigi na altar y e cruz central. Durante e ceremonia di awe, tambe lo rindi homenahe na e arkitecto Virgilio Kock, kende a diseña Kapel Emanuel y a duna e edificio su caracteristico forma y identidad. Su diseño unico a contribui na e balor historico y arkitectonico cu awe ta reconoce oficialmente.

E construccion di e kapel a bira posibel danki na e generosidad di e parokianonan di San Nicolas, e fondonan recauda pa Liga Maria y otro organisacionnan di e parokia, hunto cu un donacion financiero di LAGO. E trabounan a cuminsa na september 1965 y a completa y consagra e edficio riba dia 25 di maart 1966 pa Monseñor Holterman, Obispo di Willemstad. Durante e decadanan, Kapel Emanuel a sirbi como un luga di encuentro pa fe y comunidad. E parokianonan di e bario tabata reuni regularmente pa misa y e celebracion religioso, specialmente durante Pasco di Nacemento y Pasco Grandi. Cu e paso di tempo, e edificio a sufri daño causa pa salpeter, biento, yobida y otro factor natural.  E bentanan, tegel y diferente otro parti di e kapel a deteriora pocopoco. A pesar di varios reparacion menor durante e ultimo aña, a concentra principalmente riba otro mantencion di proyecto manera Misa Santa Teresita, Teresita Center y e edificio di pastorie.

Na aña 2003, e pastornan Tony Peralta y Toti Fuentebella, hunto cu e Conseho Pastoral Parokial, a decidi pone Kapel Emanuel como prioridad den e trabounan di renobacion. Cu apoyo di e programa “Un Rosa pa Santa Teresita” y diferente campaña di recaudacion, a logra reuni fondo pa cambia vloer, altar, dak, plafond, bentana, sistema di luz y renoba e interior di e edificio. San Nicolas Business Association tambe a brinda apoyo pa mehora e exterior di e kapel. Despues di mas cu cuarenta aña di servicio na comunidad, Kapel Emanuel ta sigui para como un simbolo di fe y union pa e generacionnan den e comunidad di San Nicolas. Cu su declaracion oficial como monumento protehi, Aruba ta sigura cu e historia y e balor unico di e edificio lo  preserva pa e generacionnan den futuro.

Gobierno di Aruba hunto cu Prome Minister Mike Eman ta invita residente, e parokianonan y tur persona cu tin interes den historia y patrimonio di Aruba pa yega awe tardi pa 6 or na Grote Bergweg na San Nicolas y presencia e momento historico aki. Durante e ceremonia, Kapel Emanuel lo ricibi oficialmente su status di monumento protehi y tambe lo rindi homenahe na su arkitecto, Virgilio Kock, pa su aporte na patrimonio di Aruba.