Dia 2 di april, na e ocasion di celebracion di Dia Mundial di Conscientisacion di Autismo, Gobierno di Aruba a tene un evento di conscientisacion “Light it up Blue” dilanti di Bestuurskantoor. Na e ocasion aki e hoben Kay Quandus a presenta un bunita poema.
E poema tabata como lo siguiente:
Bo kier sa ta ken mi ta?
Mi rasa ta humano y mescos cu bo.
Mi tambe tin mi cualidadnan,
kisas pa bo un poco raro.
Cana riba tenchi ta mi cos.
Pero mi ta hopi sensitivo.
No papia duro,
mi orea no por cu tanto grito.
Mi accionnan tin ora mi no por controla.
Y bo reaccionnan lo por lastima.
Mi por ta brutalmente honesto,
pero please no considera mi fresco.
Den un mundo di fantasia mi sa biaha, Caminda parha ta bula
y hasta porco por bay laira.
E ta zona chistoso, pero tin biaha e por ta spantoso.
Mi tolerancia di dolor ta hopi halto.
Pero no ta p’esey mi ta gusta brasamento tanto.
Aunke mi amor ta complica pa algun,
pa stima bo … ta ami ta esun.
Pero label no ta necesario.
Mi tin cualidadnan extra ordinario.
Un IQ halto y yena cu imaginacion.
Ta loke cu ta haci mi asina campeon.
Purba compronde mi actuacion,
y duna mi cariño na monton.
Ta miho forma pa yuda mi.
Y mas cu tur cos …. djis stima mi.
Pa conclui srta Kay Quandus a expresa cu el a skirbi e poema bunita aki tempo cu e tabata atende scol Mavo cu ayudo di un maestra yama Juffrouw Garcia. E juffrouw a yude expresa su mes a traves di e palabranan cu tin den e poema.
Prome Minister Evelyn Wever-Croes, den nomber di Gobierno di Aruba ta gradici Kay Quandus pa a forma parti di e evento “Light it Up Blue” compartiendo su poesia hopi bunita cu pueblo di Aruba.
“Inclusion di nos ciudadanonan cu abilidadnan special ta prioridad di Gabinete Wever-Croes II. Hunto nos ta traha pa brinda nan miho oportunidadnan y pa laga ningun atras. Esaki ta mi compromiso”, Prome Minister a enfatisa.
