E posicion di Merca cu su boycot y sancionnan contra Venezuela a cuminsa na 2015 cu Obama, prome cu accionnan leve y cualnan a bira fuerte na momento cu Trump a bira presidente di 2017 pa 2020.
E sancionnan pisa, cualnan ta contra tur leynan internacional, te awe ta vigente cu Venezuela no por haci mucho intercambio cu otro pais of companianan na mundo. Mesora Merca ta sanciona e pais of compania cu accionnan pisa.
Esey a haci cu Venezuela no por a comercialisa cu otro paisnan cualnan tin miedo di accionnan di Merca, consecuencia pobreza grandi na Venezuela.
China cu Rusia no ta duna mucho balor na e sancionnan di Merca.
Na Aruba tambe nos a conoce e consecuencianan di e sancionnan aki. Pa varios anja caba, nos no tin ningun intercambio cu e pais mas serca di Aruba.
E plan pa habri nos refinaderia dor di uza e refinaderia pa un proceso unda ta cambia e crudo pisa di Orinoco den un sorto di crudo liviano, cual tin un bon prijs ariba mercado mundial, no a sigui. Tabatin basta movecion pa e reapertura, Citgo tabata financia tur cos, pero e sancionnan contra Venezuela a para tur cos.
Na 2019 un tal senjor Guaido ariba un plasa na Caracas a autoproclama su mes presidente di Venezuela y Merca di biaha a reconoce y pasa e compania Citgo pa Guaido, pues claramente un indicacion cu Guaido ta un proyecto mericano. Na mei 2019, representantenan di Guaido a bisa nos prome Ministro cu Citgo a wind down (para actividad) e refinaderia.
Na 2019, Guaido tabata fuerte ya cu e a ricibi reconocimento di banda di 55 pais incluyendo na UE (Union Europea). Bao presion di Merca, hunto cu varios lidernan di Gobierno di paisnan Latino a lanta un organisacion Grupo de Lima, cu e meta pa cambio e Gobierno na Venezuela y buta Guaido como Presidente.
Merca ta mantene su boycot y sancionnan ainda, hasta awor aki, despues di fracasonan y corrupcionnan pisa di su proyecto cu yama Guaido
Awe solamente, Story embahador di USA na Venezuela, pero cu sede na Bogota ta trece un posicion cu por bisa ta keda e posicion di Merca. E ta pidi eleccion pa presidente di Venezuela entre Maduro y Guaido, a pesar cu Guaido su aprobacion, según un encuesta di un compania anti-Maduro, a baha te na 4% y 86% ta rechase categoricamente.
Hopi ta e cambionan na 2021, entrenan e posicion di Abrams cu ta suta oposicion.
E figura cu Presidente Trump a nombra como su representante pa Venezuela, Eliot Abrams awor tin critica pisa ariba Guaido y full oposicion. Según Abrams den un intrevista cu un medio di publicacion, Guaido no a sigui e plan di Ruta di Merca y a fracasa ocacion tras di ocacion. Berdad según Abrams, Guaido no ta apto pa e funcion cu e a ricibi. E no ta comprende hopi cos y falta hopi di carisma pa dirigi e pais. Según Abrams su proposicion pa un gobierno nacional na Venezuela cu participacion di un militar a ser rechasa pa Guaido.
Según Abrams Guaido lo pasa como un fracaso y den historia di Venezuela aki poco tempo ningun hende lo recorde. Interesante loke Abrams a declara cu e declaracion di Trump, di otro funcionarionan Mericano, di lidernan di oposicion na Venezuela, kendenan na hopi ocacion a bisa cu tur opcion ta ariba mesa, hasta e opcion di intervencion militar di Merca na Venezuela.
Lidernan militar mericano e tempo ey 2019 =-2020, a declara cu nan no ta prepara pa intervencion militar na Venezuela, nan no tin militarnan pa haci e trabao, ya nan tabata involucra na Afghanistan, na Irak y tambe cu nan accionnan na Indo-China den e politica di contra China.
Abrams a bisa cu e expresionnan aki tabata solamente pa spanta balente.
Tambe Abrams a lansa critica pisa ariba otro lidernan di oposicion, kendenan a hiba e oposicion di malo pa peor. Nan a grita pa abstencion dos biaha y awor nan ta den campanja electoral. Pa Abrams, Enrique Capriles, kende tabata candidato pa presidente di Venezuela y a perde dos eleccion, ta un hipocita cu a sirbi solamente pa dividi oposicion, e ta un nada, según Abrams. E expresionnan di Abrams por ser mira como un mea culpa, mi a fracasa.
Mientras Biden mes ta keto y tin hopi otro problema pa soluciona den maneho di su pais.
Cambio di Posicion di UE
Otro reconocimento oficial di Maduro como presidente ta e posicion Union Europeo.
Guaido ya no ta ser reconoci mas como presidente Interino, pero como un simpel lider di oposicion.
Spanja cu semper a reconoce Guaido, e ultimo dianan aki a dicidi di cambia su posicion y nan a reconoce Maduro como presidente. Spanja a invita delegacionnan di embahada di Gobierno Maduro na tur pais, na e fiestanan di 12 oktober proximo na tur su embahadanan na mundo. Pues un reconocimento oficial di Venezuela. Guaido a ser benta bao di bus.
Tambe UE ta reconoce Venezuela y UE ta manda un organisacion grandi como observadornan na e eleccionnan di 22 november na Venezuela, prome biaha desde 2005.
E partido di G4 UNT (Un Nuevo Tiempo) ta contento cu e posicion di UE y a pidi otro organisacionnan na mundo pa haci mescos. Mientras Guaido a critica fuertemente contra e posicion di UE. Según Guaido, contra e posicion di e otro partidonan di su coalicion G4, no por tin eleccion na Venezuela.
Otro cambio grandi ta loke a pasa na Peru.
Netamente na e pais aki, algun anja pasa Merca a crea e organisacion di hefenan di estado Latino-Americano pa baha presidente Maduro di Venezuela, cu e nomber Grupo de Lima.
Cu eligimento di un presidente nobo Pedro Castillo, un izquierdista, su gobierno a reconoce Maduro como presidente di Venezuela, e grupo de Lima a keda sin nomber y ta ser bisa cu e grupo a desolve su mes.
Castillo un homber di Campo cu su sombre hancho a ricibi hopi elogio na diferente evenemento cu e a assisti, entrenan su discurso den Asamplea Genderal di Nacionnan Uni e luna aki.
Negociacionnan na Mexico
Ta bon pa menciona cu na augustus a inicia na Mexico e negociacionnan entre Gobierno Maduro y partidonan di Oposicion den G4 (Primera Justicia, Accion Democratico, Un Nuevo Tiempo y Voluntad Popular). Gobierno su team ta consisiti di 9 persona, di cual presidente di Asamblea general Jorge Rodrigues ta vocero. E team di G4 tambe ta consisti di 9 persona, vocero ta Bleide. Na final di prome encuentro a firma un memorandum cu gobierno y G4 ta reconoce tur e institutonan Venezolano y varios asuntonan mas. A sigui varios reunionnan mas y e intencion ta pa yega na un bon entendimento entre oposicion y Gobierno
Algun siman atrás tabatin e reunion grandi di hefenan di estado y otro representantenan di gobierno di Latino-America den CELAC (Comunidad de Estados Latinoamericanos y Caribeños). Cu excepcion di dos paisnan presente, Uruguay y Paraquay, Maduro a ser reconoci como como Presidente di Venezuela.
Tambe ta bon pa menciona cu esnan cu a sobresali durante e encuentro di CELAC tabata AMLO, presidente di Mexico y Nicolas Maduro.
Pleito formal den oposicion
Ultimo simannan un pleito formal a sali afo for di seno di oposicion, E partido PJ (Primera Justicia) di Capriles y Julio Borges a cuestiona formalmente e maneho di Guaido relaciona cu e biennan di e gobierno interino dirigi pa Guaido. E biennan ta e dos companianan grandi, Monomeros na Baranquilla, Colombia y Citgo na Merca. E companianan aki malmaneha pa e hendenan di Guaido y tur dos ta pasando mal momentonan dor di hortamento formal di placa, hasta ta papia di bancarota y por wordo perdi pa Venezuela. Borges tabata un sorto di Canciller di e gobierno di Guaido, pero malmaneho a pone cambia di posicion.
Despues di ta parti di e desicionnan pa cu e companaianan aki pa mas cu 2 anja, awor PJ no kier tin nada mas di haci cu e maneho di e companianan aki, pasobra segun PJ, Guaido y su hendenen di partido VP (Voluntad Popular) no ta tene cuenta cu proposicionnan y sugerencianan di PJ. Tambe cu ta e hendenan di VP ta hibando e maneho malo na e 2 companianan prome menciona.
Guaido a contesta cu tur decisión den maneho di e companianan ta ser tuma a basa di consenso entre tur partido di G4. Pues según Guaido, PJ tambe ta culpable di malmaneho y robo den e 2 companianan aki. Como 2 anja pasa un exdirector di PDVSA, Calderon Berthi, kende tabata nombra den direccion di Monomeros retira for di su funcion pa motibo di e maneho politico enbes di un maneho empresarial. Awe Berthi ta bisa cu ta Leopoldo Lopez, donjo di e partido VP y hefe di Guaido ta e culpabel di e fracaso di e compania.
Pues Pj dos anja pasa tabata sa kico ta pasando y nan posicion di awe ta manera ‘Yo No Fui”.
Tur cos ta mustra cu e barco di e gobierno Interino yama Guaido ta hundiendo y e djacanan (PJ, UNT y Ad) ta bandonando e barco.
Por spera mas pelea entre e partidonan di G4 prome cu 22 november 2021 yega.
Final
Hopi ta puntra kico Biden ta bay haci den su relacion cu Venezuela.
Su hendenan den congreso y senado ta pidi un cambio di maneho sin sancion.
Union Europeo ya ta reconoce Maduro y ta manda observadornan pa e eleccion di 22 november 2021.
Gobiernonan di Latino-America pa gran parti ta cu e gobierno Maduro.
E proyecto Mericano yama Guaido, colma cu corrupcion, ta yegando su fin.
Gregorio Wolff
